قۇلسارى قالاسىندا قازاق اسحاناسىنىڭ ەڭ تانىمال تاعامدارىنىڭ ءبىرى — سۋبليماسيالانعان بەشبارماقتىڭ يننوۆاسيالىق نۇسقاسى ازىرلەندى. دايىن ونىمگە ىستىق سۋ قۇيىپ، بىردەن داستارقانعا قويۋعا بولادى، دەپ حابارلايدى infohub.kz سايتى.
جاڭا ءونىم تۋرالى كاسىپكەر انار بەيسەن الەۋمەتتىك جەلىلەردە تانىستىردى. ول جاساندى قوسپالارسىز، 100% تابيعي ۇلتتىق تۇسكى اس رەتىندە ۇسىنىلىپ، نەبارى بەس مينۋتتا دايىن بولادى. جيناققا ەت، جايما جانە تۇزدىق كىرەدى.
جاڭا ءونىم جەرگىلىكتى بيلىكتىڭ نازارىن اۋداردى. 5 تامىزدا ستارتاپ اتىراۋ وبلىسى جىلىوي اۋدانى اكىمىنە رەسمي تۇردە تانىستىرىلدى. الەۋمەتتىك جەلىلەردەگى جاريالانىمدار قازاقستاندىقتار اراسىندا قىزۋ تالقىلاۋ تۋدىردى.
Kursiv LifeStyle-كە بەرگەن سۇحباتىندا بەيسەن 2022 جىلدان باستاپ Maliboo ستۋدياسىن دامىتىپ كەلە جاتقانىن، باستاپقىدا شوكولادتاعى قۇلپىنايمەن اينالىسقانىن ايتتى. كەيىن نەسيە الىپ، مەملەكەتتىك باعدارلامالار بويىنشا جابدىق ساتىپ الىپ، جەمىستەردى سۋبليماسيالاۋدى مەڭگەرىپ، كوپتەن بەرگى ارمانى — سۋبليماسيالانعان بەشبارماق جاساۋدى جۇزەگە اسىرۋدى شەشتى.
بەشبارماق الدىمەن كادىمگى تاسىلمەن دايىندالادى. سودان كەيىن ەت، قامىر جانە باسقا دا ينگرەديەنتتەر سۋبليماسيا پروسەسىنەن وتەدى. بۇل كەزدە ونىمدەردەن ىلعال كەتەدى، ال باستاپقى قاسيەتتەرىنىڭ كوپ بولىگى ساقتالادى.
«مەن بۇل يدەيامەن جۇمىس ىستەپ جۇرگەندە ۇيقىدان ايىرىلدىم. سۋبليماسيا تەحنولوگياسى پايدالى قاسيەتتەردىڭ 90-95% جانە حيميالىق قوسپالارسىز باستاپقى ءدامىن ساقتايدى. بۇل تولىققاندى جاڭا تۇسكى اس. ءقازىر نيۋ-يوركتەن، تۇركيادان، رەسەيدەن، سونداي-اق تۋريستەردەن، ساياحاتشىلاردان جانە شەتەلدە وقيتىن ستۋدەنتتەردىڭ اتا-انالارىنان تاپسىرىستار الىپ جاتىرمىز»، — دەدى بەيسەن.
جاريالانىمداردىڭ استىندا كەيبىر پايدالانۋشىلار يدەيانى قولداپ، ونى ساياحات پەن جولعا ىڭعايلى دەپ اتاسا، باسقالارى قۇنىن كادىمگى بەشبارماقپەن سالىستىرىپ، باعاسىنا كۇمان كەلتىردى. ايتا كەتەيىك، ءونىمنىڭ قۇنى — پورسياسىنا 3500 تەڭگە. تۇسىنىكتەمەلەردە جاڭا ءونىمدى تەز دايىندالاتىن كەسپەلەرمەن يرونيامەن سالىستىرىپ، باعانى كەم دەگەندە 1500 تەڭگەگە دەيىن ءتۇسىرۋدى ۇسىنادى.
«قىتايدىڭ روللتونى — 600 تەڭگە، بەشبارماق — 3500 تەڭگە. قازاقستان بىردەڭە ويلاپ تاپسا، باعانى قىمبات ۇستايدى. كەم دەگەندە 1500 تەڭگەدەن ساتۋعا بولار ەدى»
«ستامبۋلعا وزىڭمەن بىرگە الىپ كەتۋگە بولادى ەكەن. بۇل — تۋعان جەردىڭ ءدامى. كەرەمەت. ساتتىلىك!»
«اللا بەرەكە بەرسىن»، — دەيدى پايدالانۋشىلار.
بەيسەن 3500 تەڭگە — بۇل ەڭ تومەنگى باستاپقى باعا، ول ەڭبەك شىعىندارىن، ەلەكتر ەنەرگياسى مەن قىمبات سۋبليماسيا تەحنولوگياسىنىڭ شىعىندارىن تولىق وتەمەيتىنىن تۇسىندىرەدى. بولاشاقتا باعا قايتا قارالۋى مۇمكىن.
ازىرگە كاسىپكەر ءونىم مەن قاپتامانى جەتىلدىرۋدى جالعاستىرۋدا. بولاشاقتا ول قوسىمشا جابدىق ساتىپ الىپ، ءوز ءوندىرىسىن اشىپ، ءوز برەندىمەن تەك بەشبارماق قانا ەمەس، باسقا دا ۇلتتىق تاعامداردى شىعارعىسى كەلەدى.
بەيسەننىڭ باستى ماقساتى — قازاقستاندىق سۋبليماسيالانعان ۇلتتىق ونىمدەردى شەتەل نارىعىنا شىعارۋ.
بۇعان دەيىن Kursiv LifeStyle نەمىستىڭ درەزدەن قالاسىنىڭ ءدال ورتاسىندا، ايگىلى فراۋەنكيرحە شىركەۋىنىڭ جانىندا Beshbarmak اتتى ورتاازيالىق اسحانانىڭ جاڭا مەيرامحاناسى اشىلعانىن جازعان بولاتىن. رەسمي اشىلۋى 1 شىلدەدە ءوتتى.