قازاقستان رەسپۋبليكاسىنىڭ دەنساۋلىق ساقتاۋ مينيسترلىگى «مەملەكەتتىڭ قاجەتتىلىگىن قامتاماسىز ەتۋگە ارنالعان بيوفارماسەۆتيكالىق ءونىمدى ايقىنداۋ تۋرالى» بۇيرىق جوباسىن دايىندادى. قۇجات قازاقستان رەسپۋبليكاسىنىڭ «بيولوگيالىق قاۋىپسىزدىك تۋرالى» زاڭىنىڭ 19-2-بابىنىڭ 2-تارماعىنا سايكەس ازىرلەنگەن. ونىڭ ماقساتى — يمپورتقا تاۋەلدىلىكتى ازايتۋ، مامانداندىرىلعان پرەپاراتتاردى وتاندىق ءوندىرۋدى ساقتاپ قالۋ جانە ەلدىڭ ەپيدەميولوگيالىق اسقىنۋلارعا دايىندىعىن قامتاماسىز ەتۋ، دەپ حابارلايدى infohub.kz سايتى.
جوبانىڭ نەگىزدەمەسىندە اتاپ وتىلگەندەي، مامانداندىرىلعان پرەپاراتتاردىڭ كەپىلدى وتاندىق كوزى بولعان جاعدايدا ينفەكسيا وشاقتارى پايدا بولعان كەزدە زەرتحانالىق دەن قويۋدى جەدەل جۇرگىزۋگە مۇمكىندىك تۋادى.
بۇيرىق جوباسىندا وتاندىق ءونىم ەپيدەميولوگيالىق جانە ەپيزووتولوگيالىق مونيتورينگ جۇرگىزۋگە، سونداي-اق بەيىندى زەرتحانالار مەن ەپيدەمياعا قارسى قىزمەتتەردىڭ تۇراقتى دايىندىعىن ۇستاپ تۇرۋعا قاجەت ەكەنى تۇسىندىرىلەدى.
«مامانداندىرىلعان بيوفارماسەۆتيكالىق ءونىمدى ەل ىشىندە ءوندىرۋدى ساقتاۋ يمپورتتىق جەتكىزىلىمدەرگە تاۋەلدىلىكتى جانە سوعان بايلانىستى تاپشىلىق ءقاۋپىن ازايتۋعا ءتيىس»، — دەپ اتاپ ءوتتى بۇيرىق جوباسىن ازىرلەۋشىلەر.
مۇنداي قاۋىپتەر اسىرەسە ەپيدەميولوگيالىق اسقىنۋ، توتەنشە جاعدايلار، حالىقارالىق لوگيستيكانىڭ شەكتەلۋى نەمەسە مامانداندىرىلعان پرەپاراتتارعا سۇرانىستىڭ كۇرت ارتۋى كەزىندە وزەكتى.
وتاندىق وندىرىستىك بازا بولعان جاعدايدا قاجەت كەزدە ءونىمنىڭ قاجەتتى توپتامالارىن جەدەل شىعارىپ، مەملەكەتتىك قاجەتتىلىككە قور جاساقتاۋعا مۇمكىندىك تۋادى.
بۇيرىق جوباسى تەحنولوگيالىق تاۋەلسىزدىكتى جانە جۇيەنىڭ تۇراقتى دايىندىعىن قامتاماسىز ەتۋگە، يمپورتقا تاۋەلدىلىكتى ازايتۋعا جانە مەملەكەتتىك ۇيىمداردى مامانداندىرىلعان بيوفارماسەۆتيكالىق ونىممەن تۇراقتى جابدىقتاۋعا باعىتتالعان.
وسىلايشا، قۇجات بيولوگيالىق قاۋىپسىزدىك سالاسىنداعى مىندەتتەردى ورىنداۋ ءۇشىن مەملەكەتكە تۇراقتى نەگىزدە قولجەتىمدى بولۋى ءتيىس ءونىمدى ايقىنداۋدىڭ نورماتيۆتىك نەگىزىن قالىپتاستىرۋدى كوزدەيدى.