قازاقستاننىڭ NVIDIA جانە Firebird AI-مەن بىرلەسىپ دامىتىپ جاتقان Data Center Valley جوباسى اياسىنداعى العاشقى دەرەكتەر ورتالىعىن 2027 جىلى ماۋسىمدا پايدالانۋعا بەرۋ جوسپارلانۋدا. بۇل تۋرالى پرەمەر-مينيستر ولجاس بەكتەنوۆتىڭ توراعالىعىمەن وتكەن كەڭەستە «قازاقتەلەكوم» باسشىسى باعدات مۋسين مالىمدەدى، دەپ حابارلايدى infohub.kz سايتى.
ونىڭ ايتۋىنشا، قۋاتى 50 مۆت بولاتىن العاشقى نىساننىڭ قۇرىلىسى ءقازىردىڭ وزىندە ءجۇرىپ جاتىر. ءقازىر ەنەرگوورتالىقتار مەن AI-فابريكالارعا ارنالعان شۇڭقىرلاردى ازىرلەۋ جۇمىستارى 90%-عا اياقتالعان. الاڭدا ەنەرگوورتالىقتاردىڭ ىرگەتاسىن قالاۋ باستالىپ، اكىمشىلىك-تۇرمىستىق عيماراتتاردى سالۋ جالعاسۋدا.
2026 جىلدىڭ جەلتوقسان ايىنىڭ سوڭىنا دەيىن مەردىگەرلەر دەرەكتەر ورتالىعى مەن ەنەرگوبلوكتاردىڭ نەگىزگى كورپۋستارىن، اكىمشىلىك-تۇرمىستىق كەشەندى، باقىلاۋ-وتكىزۋ پۋنكتتەرىن جانە سىرتقى ينجەنەرلىك جەلىلەردىڭ ءبىر بولىگىن سالۋى ءتيىس. ىسكە قوسۋ-رەتتەۋ جۇمىستارىن 2027 جىلى مامىردا اياقتاۋ جوسپارلانۋدا.
«ءبىزدىڭ باستى مىندەتىمىز – العاشقى نىساننىڭ قۇرىلىسىن 2027 جىلى ماۋسىمدا اياقتاۋ. سونىمەن قاتار، كليەنتتەر تاراپىنان راستالعان سۇرانىستى ەسكەرە وتىرىپ، كامپۋس قۋاتىن كەزەڭ-كەزەڭىمەن ارتتىرۋعا مۇمكىندىك بەرەتىن ينجەنەرلىك نەگىزدى جاساپ جاتىرمىز»، – دەدى مۋسين.
جوبانى ەلەكترمەن جابدىقتاۋ ءۇشىن قۋاتى 215 مۆت قوسالقى ستانسيا ساتىپ الىنعان. سونداي-اق سۋمەن جابدىقتاۋ جەلىلەرىنىڭ جوباسى ازىرلەنىپ، تەلەكوممۋنيكاسيالىق ينفراقۇرىلىمدى جوبالاۋ جالعاسۋدا. قۇرىلىس الاڭىندا تاۋلىك بويى ونلاين بەينەباقىلاۋ جۇيەسى جۇمىس ىستەيدى. بولاشاقتا Data Center Valley قۋاتىن كەزەڭ-كەزەڭىمەن 1 گۆت-قا دەيىن ارتتىرۋ جوسپارلانۋدا.
جوبا دەرەكتەر ورتالىقتارىن، AI-فابريكالاردى، GPU-كلاستەرلەردى جانە حالىقارالىق تەحنولوگيالىق كومپانيالاردىڭ بۇلتتى پلاتفورمالارىن ورنالاستىرۋعا ارنالعان الاڭ قۇرۋدى كوزدەيدى. ۇكىمەتتە بۇل قازاقستاندا سيفرلىق ەكونوميكانىڭ جاڭا ەكسپورتتىق سەكتورىن قۇرۋعا جانە جاساندى ينتەللەكت سالاسىنداعى وتاندىق ازىرلەمەلەرگە ينفراقۇرىلىمدى قامتاماسىز ەتۋگە مۇمكىندىك بەرەدى دەپ سانايدى.
«Data Center Valley قازاقستاننىڭ جاڭا ەكسپورتتىق الەۋەتىن قالىپتاستىرادى. ەسەپتەۋ قۋاتتارىن ەل ىشىندە ورنالاستىرا وتىرىپ، ءبىز وتاندىق AI-شەشىمدەردى دامىتۋعا، جاھاندىق كومپانيالاردى تارتۋعا جانە قازاقستاننىڭ حالىقارالىق سيفرلىق قىزمەتتەر نارىعىنا شىعۋىنا جاعداي جاسايمىز»، – دەپ اتاپ ءوتتى جاساندى ينتەللەكت جانە سيفرلىق دامۋ ءمينيسترى جاسلان مادييەۆ.
Data Center Valley اياسىندا قازاقستان Firebird AI جانە NVIDIA-مەن ىنتىماقتاستىقتى دا دامىتۋدا. بۇعان دەيىن، 2026 جىلدىڭ ساۋىرىندە پرەزيدەنت قاسىم-جومارت توقايەۆ NVIDIA-نىڭ جاھاندىق AI-ينفراقۇرىلىمدى دامىتۋ جونىندەگى ۆيسە-پرەزيدەنتى نيكولو مارتين كاپرەزامەن جانە Firebird AI نەگىزىن قالاۋشىلار رازميگ بەرگ وۆاكيميان مەن الەكساندر ەسايانمەن كەزدەسكەن بولاتىن. سوندا تاراپتار AI-ينفراقۇرىلىمدى جوبالاۋ، سالۋ جانە پايدالانۋ بويىنشا بىرلەسكەن جۇمىس پەرسپەكتيۆالارىن تالقىلادى.
كەزدەسۋ بارىسىندا مەملەكەت باسشىسى ەكىباستۇزدا Data Center Valley قۇرۋ جوسپارلارى تۋرالى ايتىپ، ونى قولجەتىمدى ەلەكتر ەنەرگياسى، تەلەكوممۋنيكاسيالار جانە ينۆەستورلارعا سالىقتىق پرەفەرەنسيالار بار الاڭ رەتىندە سيپاتتادى. كەلىسسوزدەر قورىتىندىسى بويىنشا تاراپتار AI-ەكوجۇيەنى دامىتۋدا بىرلەسكەن قىزمەت مۇمكىندىكتەرىن زەردەلەۋگە كەلىستى.
سونىمەن قاتار، پرەمەر-مينيستر كەڭەسىندە Cloud First Policy (Data Embassy) جوباسىن دايىنداۋ ماسەلەسى قارالدى. بۇل جوبا شەت مەملەكەتتەردىڭ دەرەكتەرىن ولاردىڭ تولىق زاڭدى ەگەمەندىگىن ساقتاي وتىرىپ، قازاقستاندا ورنالاستىرۋعا مۇمكىندىك بەرەدى.
كەڭەس قورىتىندىسى بويىنشا بەكتەنوۆ مەملەكەتتىك ورگاندار مەن كۆازيمەملەكەتتىك كومپانيالارعا قۇرىلىس جۇمىستارىن بەلگىلەنگەن مەرزىمدە ورىنداۋدى قامتاماسىز ەتۋدى جانە شەتەلدىك تەحنولوگيالىق سەرىكتەستەردى تارتۋ جۇمىستارىن جالعاستىرۋدى تاپسىردى.
بۇعان دەيىن «كۋرسيۆ» قازاقستاندا حالىقارالىق ەسەپتەۋ قۋاتتارى حابىن قۇرۋ نيەتى تۋرالى جازعان بولاتىن.