«استانا» حالىقارالىق قارجى ورتالىعى (احقو) ينۆەستيسيالىق سالىق رەزيدەنتتىگى باعدارلاماسىن (ITRP) كەڭەيتىپ، وعان سيفرلىق اكتيۆتەردى قوستى. ەندى شەتەلدىك ينۆەستورلار احقو-نىڭ ليسەنزيالانعان الاڭدارى ارقىلى سيفرلىق اكتيۆتەرگە قاراجات سالىپ، قازاقستاننىڭ ۇزاق مەرزىمدى ينۆەستورلىق ۆيزاسى مەن سالىق رەزيدەنتتىگىن الا الادى، دەپ حابارلايدى infohub.kz.
بۇعان دەيىن باعدارلاماعا قاتىسۋشىلار احقو-دا تىركەلگەن اكسيالارعا، ۇلەستەرگە، قور پايلارىنا، AIX بيرجاسىنداعى باعالى قاعازدارعا، سونداي-اق ورتالىقتا تىركەلگەن كومپانيالاردىڭ جارعىلىق كاپيتالىنا ينۆەستيسيا سالا الاتىن. بۇل قۇرالدار بويىنشا ينۆەستيسيانىڭ ەڭ تومەنگى مولشەرى 60 مىڭ اقش دوللارىنان باستاپ بەلگىلەنگەن ەدى.
ەندى ولارعا AFSA (احقو قارجى قىزمەتتەرىن رەتتەۋ كوميتەتى) ليسەنزياسى بار وپەراتورلار ارقىلى قولجەتىمدى سيفرلىق اكتيۆتەر قوسىلدى. بۇل نۇسقا ءۇشىن ينۆەستيسيانىڭ ەڭ تومەنگى مولشەرى 150 مىڭ دوللاردى قۇرايدى جانە باعدارلاماعا قاتىسۋ كەزەڭىندە وسى سومانى ساقتاۋ قاجەت.
ينۆەستيسيالىق سالىق رەزيدەنتتىگى باعدارلاماسى شەتەل ازاماتتارىنا بەكىتىلگەن قۇرالدارعا ينۆەستيسيا سالىپ، جەڭىلدەتىلگەن تارتىپپەن سالىق رەزيدەنتتىگىن الۋعا مۇمكىندىك بەرەدى. قاتىسۋعا 18 جاستان اسقان، قازاقستان ازاماتى ەمەس جانە سوڭعى 20 جىل ىشىندە ەلدىڭ سالىق رەزيدەنتى بولماعان تۇلعالار قۇقىلى.
احقو-دا بۇل شەشىم قازاقستانداعى سيفرلىق اكتيۆتەر نارىعىنىڭ دامۋىنا بايلانىستى ەكەنىن اتاپ ءوتتى. 2026 جىلى پرەزيدەنت قاسىم-جومارت توقايەۆ سيفرلىق اكتيۆتەر يندۋسترياسىن ىنتالاندىرۋ جانە دامىتۋ تۋرالى جارلىققا قول قويدى. بۇل جارلىق سالانى رەتتەۋدى جەتىلدىرۋگە، سيفرلىق قارجى ينفراقۇرىلىمىن دامىتۋعا جانە ەلدىڭ ينۆەستيسيالىق تارتىمدىلىعىن ارتتىرۋعا باعىتتالعان.
«ءبىزدىڭ باعدارلاما حالىقارالىق ينۆەستورلارعا ارنالعان قۇرالدار ءتىزىمىن سيفرلىق اكتيۆتەردى قوسۋ ارقىلى كەڭەيتتى. بۇل ينۆەستورلارعا احقو ەكوجۇيەسىندەگى ينۆەستيسيالىق مۇمكىندىكتەرگە قول جەتكىزۋگە، سونداي-اق سيفرلىق اكتيۆتەردى ەلدىڭ قارجى-تەحنولوگيالىق ارحيتەكتۋراسىنىڭ بولىگى رەتىندە دامىتۋعا ىقپال ەتەدى»، – دەدى احقو ەكسپات ورتالىعىنىڭ ديرەكتورى اينۇر جۇماتوۆا.
احقو-دا جاڭا قۇرالدىڭ ىسكە قوسىلۋى ورتالىقتىڭ كاپيتال تارتۋعا ارنالعان حالىقارالىق الاڭ رەتىندەگى پوزيسياسىن نىعايتۋعا جانە ينۆەستورلارعا زاماناۋي قارجى مۇمكىندىكتەرىنە قول جەتكىزۋگە كومەكتەسەدى دەپ سانايدى.
جاڭا ەرەجەلەر باعدارلاما اكتىسى احقو رەسمي سايتىندا جاريالانعان كۇننەن باستاپ كۇشىنە ەنەدى.