قازاقستاندا ازاماتتاردىڭ دەربەس دەرەكتەرىنىڭ تارالۋى كەزىندەگى ءىس-قيمىل ءتارتىبىن رەتتەيتىن جاڭا ەرەجەلەر بەكىتىلدى. ءتيىستى قۇجاتقا پرەمەر-مينيستردىڭ ورىنباسارى — جاساندى ينتەللەكت جانە سيفرلىق دامۋ ءمينيسترى بۇيرىققا قول قويدى، دەپ حابارلايدى infohub.kz سايتى.

اتاپ وتىلگەندەي، رەسپۋبليكادا دەربەس دەرەكتەر قاۋىپسىزدىگىنىڭ بۇزىلۋى تۋرالى حابارلاۋ ەرەجەلەرى ازىرلەندى. قۇجاتتا العاش رەت «دەربەس دەرەكتەر قاۋىپسىزدىگىنىڭ بۇزىلۋى» دەگەن ۇعىمنىڭ ءوزى بەكىتىلدى. ول دەربەس دەرەكتەردىڭ زاڭسىز تارالۋىنا، وزگەرتىلۋىنە، جويىلۋىنا نەمەسە جويىلىپ كەتۋىنە، سونداي-اق ولارعا رۇقساتسىز قول جەتكىزىلۋىنە اكەپ سوققان قورعاۋ بۇزىلىسى رەتىندە تۇسىندىرىلەدى.

جاڭا تالاپتارعا سايكەس، مۇنداي بۇزۋشىلىق انىقتالعان كەزدە دەرەكقوردىڭ مەنشىك يەسى نەمەسە وپەراتورى ۋاكىلەتتى ورگاندى ءبىر جۇمىس كۇنى ىشىندە حاباردار ەتۋگە مىندەتتى. حابارلامادا دەربەس دەرەكتەردى وڭدەۋدى ۇيىمداستىرۋعا جاۋاپتى تۇلعانىڭ بايلانىس دەرەكتەرى (بار بولسا)، سونداي-اق بۇزۋشىلىقتى جويۋ ءۇشىن قابىلدانعان شارالار كورسەتىلۋى ءتيىس.

سونىمەن قاتار، حابارلاماعا سۋبەكتىلەرگە كەيىننەن حابارلاما جىبەرۋ ءۇشىن قاجەتتى دەربەس دەرەكتەر قوسىلادى: تەگى، اتى جانە اكەسىنىڭ اتى (بار بولسا)، جانە (نەمەسە) جەكە سايكەستەندىرۋ ءنومىرى (جسن)، جانە (نەمەسە) ۇيالى بايلانىس ابونەنتتىك ءنومىرى.

بۇيرىقتا دەربەس دەرەكتەر دەپ نەنىڭ ەسەپتەلەتىنى دە تۇسىندىرىلەدى. بۇل — دەربەس دەرەكتەر سۋبەكتىسى تۋرالى ءبىر نەمەسە بىرنەشە دەربەس دەرەكتەر يدەنتيفيكاتورىمەن تولىقتىرىلعان مالىمەتتەر نەمەسە مالىمەتتەر جيىنتىعى. دەربەس دەرەكتەرى بار دەرەكقوردىڭ نەمەسە سيفرلىق وبەكتىنىڭ مەنشىك يەسى مەملەكەتتىك ورگان، وسىنداي دەرەكقورعا نەمەسە سيفرلىق وبەكتىگە يەلىك ەتەتىن، پايدالاناتىن جانە ونى باسقاراتىن جەكە نەمەسە زاڭدى تۇلعا بولا الادى. وپەراتور دەپ دەربەس دەرەكتەردى جيناۋدى، وڭدەۋدى جانە قورعاۋدى جۇزەگە اسىراتىن تۇلعا نەمەسە مەملەكەتتىك ورگان ەسەپتەلەدى.

ايتا كەتەيىك، بۇيرىق 22 قىركۇيەكتەن باستاپ قولدانىسقا ەنگىزىلەدى.

ەسكە سالايىق، تامىز ايىندا Mash باسىلىمى 15 ملن قازاقستاندىقتىڭ دەرەكتەرى جەلىگە تارالعانىن مالىمدەگەن بولاتىن. جاساندى ينتەللەكت جانە سيفرلىق دامۋ مينيسترلىگى بۇل اقپاراتقا جاۋاپ بەردى. الايدا بىرنەشە ساعاتتان كەيىن مينيسترلىك eGov بۇزىلعانىن جانە 15 ميلليون ازاماتتىڭ دەرەكتەرىنىڭ تارالعانىن جوققا شىعاردى. تەكسەرۋ داركنەتتە ساتىلعان فايلداردىڭ جۇيەگە قاتىسى جوق ەكەنىن كورسەتتى.