قازاقستان الەمنىڭ 95 ەلى اراسىندا زەينەتتە جايلى ءومىر ءسۇرۋ قۇنى بويىنشا 72-ورىنعا يە بولدى. ول ءۇشىن زەينەتكەرگە $294 مىڭ كولەمىندە جيناق كاپيتالى قاجەت ەكەنى NetCredit جانە Numbeo بىرلەسكەن زەرتتەۋىندە ايتىلعان. بۇل تۋرالى infohub.kz سايتى حابارلايدى.
اناليتيكتەر ورتاشا امەريكاندىق ءۇشىن جايلى زەينەتكە قاجەتتى جيناق سوماسىن اقش-تاعى ورتاشا زەينەت جاسى مەن ءومىر ءسۇرۋ ۇزاقتىعىنا سۇيەنە وتىرىپ ەسەپتەدى. مودەل قارتتىق كەزەڭىن 14 جىل 8،4 اي دەپ بەلگىلەيدى. سونىمەن قاتار، ەسەپ اۆتورلارى مەديسينالىق قىزمەت كورسەتۋ جانە سالىق تولەۋ شىعىندارىن ەسكەرمەگەن.
وسىلايشا، قازاقستاندا شامامەن 15 جىلعا جۋىق جايلى زەينەت ءۇشىن $294 مىڭ جيناقتاۋ قاجەت بولسا، مۇنداي زەينەتكەر ايىنا شامامەن $1،67 مىڭ نەمەسە 770 مىڭ تەڭگە جۇمساي الادى.
زەرتتەۋدەن سونداي-اق، رەيتينگكە ەنگەن ەۋرازيالىق ەكونوميكالىق وداق (ەاەو) ەلدەرى اراسىندا قازاقستان ەڭ قىمباتى بولىپ شىقتى: رەسەيدە (77-ورىن) مۇنداي زەينەت ءۇشىن $281 مىڭ، ال بەلارۋستە (85-ورىن) $267 مىڭ قاجەت. ارمەنيا مەن قىرعىزستان رەيتينگكە مۇلدە ەنبەگەن.
ورتالىق ازيادا اناليتيكتەر تەك ەكى ەلدى باعالادى. وزبەكستان قىمباتتىعى بويىنشا قازاقستاننان وزىپ، $331 مىڭ قاجەت كاپيتالمەن 56-ورىنعا ورنالاستى. جالپى الەمدىك رەيتينگتە قازاقستاننىڭ ەڭ جاقىن كورشىلەرى ۆەتنام (71-ورىن، $295 مىڭ) جانە مالايزيا (73-ورىن، $292 مىڭ) بولدى.
الەمدەگى ەڭ قىمبات ەلدەر ءتىزىمىن سينگاپۋر باستادى، وندا زەينەتتە جايلى ءومىر ءسۇرۋ ءۇشىن $1،1 ملن جيناۋ كەرەك. ۇزدىك ۇشتىككە يسلانديا ($893 مىڭ) جانە شۆەيساريا ($859 مىڭ) ەندى. ەڭ قولجەتىمدىسى پاكىستان (95-ورىن) بولدى، وندا زەينەتكەرگە $187 مىڭ جەتەدى. ءتىزىمنىڭ ەڭ تومەنگى جاعىندا پاكىستانمەن قاتار ءۇندىستان ($189 مىڭ)، سونداي-اق بانگلادەش پەن مىسىر (ەكەۋى دە $190 مىڭ) ورنالاستى.
سالىستىرۋ ءۇشىن: اقش-تا قارتايعاندا جايلى دەمالىس ءۇشىن $738 مىڭ (5-ورىن)، كانادادا $598 مىڭ، ال مەكسيكادا $356 مىڭ تولەۋگە تۋرا كەلەدى. زەرتتەۋدەگى ەڭ قىمبات جانە ەڭ ارزان مەملەكەت اراسىنداعى ايىرماشىلىق $900 مىڭنان استى.
سونداي-اق، تۇركيانىڭ قازاقستاننان قىمباتىراق بولعانى قىزىقتى – 46-ورىن جانە $361 مىڭ جيناق. ال جۇڭگو، كەرىسىنشە، $15 مىڭعا ارزان – 79-ورىن جانە $279 مىڭ.