جەكە مەكتەپتەردى قارجىلاندىرۋدى سيفرلاندىرۋ قازاقستانعا ءتورت ايدا 8 ملرد تەڭگە ۇنەمدەۋگە مۇمكىندىك بەردى، دەپ حابارلايدى infohub.kz سايتى.
ۇكىمەت ءباسپاسوز قىزمەتىنىڭ مالىمەتىنشە، ەندى مەملەكەتتىك ءبىلىم بەرۋ تاپسىرىسى تەكسەرىلگەن دەرەكتەر نەگىزىندە ەسەپتەلەدى، ال ءبىلىم بەرۋ قىزمەتتەرىنە اقى تولەۋ سيفرلىق قۇرالدار ارقىلى جۇزەگە اسادى.
2025 جىلدىڭ كۇزىندە قازاقستاندا OrtaBilim سەرۆيسى ىسكە قوسىلدى. ول جەكە مەكتەپتەردىڭ جان باسىنا شاققانداعى قارجىلاندىرۋىن قارجى مينيسترلىگىنىڭ e-Qazyna پلاتفورماسىنا اۋداردى. مەملەكەتتىك تاپسىرىستى ورنالاستىرۋ ءبىلىم بەرۋ باسقارمالارىنا بەرىلدى.
قارجىلاندىرۋ سوماسى وقۋشىلار سانى، وقۋ جاعدايلارى جانە بەلگىلەنگەن نورماتيۆتەر ەسكەرىلە وتىرىپ، اۆتوماتتى تۇردە ەسەپتەلەدى. كونتينگەنت تۋرالى دەرەكتەر «كۇندەلىك» جۇيەسى جانە باسقا دا مەملەكەتتىك ورگانداردىڭ دەرەكقورلارىمەن ينتەگراسيا ارقىلى ناقتى ۋاقىت رەجيمىندە تەكسەرىلەدى.
قازىرگى ۋاقىتتا پلاتفورمادا 899 جەكە مەكتەپ سيفرلاندىرىلعان. 2026 جىلدىڭ قاڭتار–مامىر ايلارىندا وپەراتور 749 مەكتەپتىڭ اكتىلەرىن 102،9 ملرد تەڭگەگە تولەدى.
سيفرلىق تەكسەرۋ وقۋعا ارنالماعان عيماراتتاردا — كوتتەدجدەردە، كەڭسەلەردە جانە بۇرىنعى وندىرىستىك ءۇي-جايلاردا ورنالاسقان 145 مەكتەپتى انىقتادى. ولار بويىنشا مەملەكەتتىك تاپسىرىس كولەمى 38 ملرد تەڭگەنى قۇرايدى.
2027 جىلدىڭ 1 قاڭتارىنان باستاپ عيماراتتارى ءبىلىم بەرۋ قىزمەتىنە ارنالماعان جەكە مەكتەپتەردە مەملەكەتتىك تاپسىرىس قارجىلاندىرىلمايدى.
وسى ۋاقىتقا دەيىن مەكتەپ يەلەرى نىسانداردى سانيتارلىق جانە قالا قۇرىلىسى تالاپتارىنا سايكەستەندىرە الادى. رەفورما بيۋدجەت قاراجاتىن شىنىمەن ءبىلىم بەرۋ قىزمەتىن كورسەتەتىن جانە بەلگىلەنگەن نورمالارعا سايكەس كەلەتىن مەكتەپتەردىڭ الۋىنا باعىتتالعان.