قازاقستاندا 2026 جىلدىڭ سەگىز ايىندا ەسىرتكىنى ناسيحاتتاۋ جانە زاڭسىز جارنامالاۋ فاكتىلەرى بويىنشا 74 قىلمىستىق ءىس قوزعالدى. بۇل دەرەكتەردى ىشكى ىستەر مينيسترلىگىنىڭ اقپاراتتىق مەدياپورتالى ۇسىندى، دەپ حابارلايدى infohub.kz سايتى.
ىشكى ىستەر ورگاندارىنىڭ ناقتىلاۋىنشا، ەسىرتكى جارناماسىنىڭ ينتەرنەتتە، الەۋمەتتىك جەلىلەردە، مەسسەندجەرلەردە، سونداي-اق گراففيتي، حابارلاندىرۋلار مەن QR-كودتار ارقىلى تارالۋىنا ەرەكشە كوڭىل ءبولىنىپ وتىر.
«مۇنداي سحەمالارعا جاستاردى تارتۋعا ءجيى ارەكەت جاسالادى: جازۋلاردى ءتۇسىرىپ، ەسىرتكى دۇكەندەرىنە سىلتەمەلەردى تاراتۋ ءۇشىن "وڭاي تابىس" ۇسىنىلادى»، — دەلىنگەن حابارلامادا.
ءىىم مۇنداي ارەكەتتەر قىلمىستىق جاۋاپكەرشىلىككە اكەپ سوعاتىنىن ەسكە سالادى. «ەسىرتكى قۇرالدارىن، پسيحوتروپتىق زاتتاردى، ولاردىڭ انالوگتارى مەن پرەكۋرسورلارىن ناسيحاتتاعانى نەمەسە زاڭسىز جارنامالاعانى ءۇشىن ءۇش جىلعا دەيىن باس بوستاندىعىنان ايىرۋ جازاسى قاراستىرىلعان، ال اۋىرلاتاتىن ءمان-جايلار بولسا — ءۇش جىلدان التى جىلعا دەيىن»، — دەپ قوستى پوليسيا.
پوليسيا اكىمدىكتەرمەن، ءبىلىم بەرۋ ۇيىمدارىمەن، قوعامدىق بىرلەستىكتەرمەن جانە ەرىكتىلەرمەن بىرلەسىپ پروفيلاكتيكالىق جانە رەيدتىك ءىس-شارالار جۇرگىزىپ جاتىر. انىقتالعان ەسىرتكى گراففيتيلەرى مەن زاڭسىز جارنامانىڭ باسقا دا تۇرلەرى جويىلىپ، ولاردى ورنالاستىرۋعا قاتىسى بار ادامدار انىقتالۋدا.
«ءىىم ازاماتتاردى ەسىرتكى جارناماسىنىڭ انىقتالعان فاكتىلەرى تۋرالى پوليسياعا حابارلاۋعا شاقىرادى. ونىڭ تارالۋىن توقتاتۋ جانە جاستاردى ەسىرتكى قىلمىسىنا تارتۋدىڭ الدىن الۋ جۇمىستارى تۇراقتى نەگىزدە جالعاسۋدا»، — دەپ اتاپ ءوتتى پوليسيادا.
بۇعان دەيىن قازاقستاندا تىيىم سالىنعان زاتتار ادەتتە الەۋمەتتىك جەلىلەر ارقىلى ساتىلاتىنى، ال ولاردىڭ جارناماسى ۇيلەردىڭ قابىرعالارى مەن قورشاۋلارعا گراففيتي تۇرىندە تۇسىرىلەتىنى حابارلانعان بولاتىن. ولاردى ءوز بەتىنشە بوياۋعا كەڭەس بەرىلمەيدى.