قازاقستاندىق گيدروگەولوگتار اقش گەولوگيالىق قىزمەتىمەن (USGS) بىرلەسىپ ۇيىمداستىرىلعان التى ايلىق بىلىكتىلىك ارتتىرۋ باعدارلاماسىن اياقتادى. وسى ۋاقىت ىشىندە USGS ساراپشىلارى قاتىسۋشىلاردى جەراستى سۋلارىن باقىلاۋ، باعالاۋ جانە مودەلدەۋدىڭ زاماناۋي تەحنولوگيالارىمەن تانىستىردى، ال ۇزدىك تىڭداۋشىلار حالىقارالىق سەرتيفيكاتتار الدى. سۋ رەسۋرستارى جانە يرريگاسيا مينيسترلىگى شەتەلدىك ارىپتەستەرمەن ىنتىماقتاستىق جالعاساتىنىن اتاپ ءوتتى دەپ حابارلايدى infohub.kz سايتى.
وقىتۋ قازاقستان رەسپۋبليكاسى سۋ رەسۋرستارى جانە يرريگاسيا مينيسترلىگىنىڭ جەراستى سۋلارى دەپارتامەنتى تاراپىنان USGS-پەن ىنتىماقتاستىق اياسىندا ۇيىمداستىرىلدى. التى اي بويى امەريكالىق ماماندار «قازگيدروگەولوگيا» ۇلتتىق گيدروگەولوگيالىق قىزمەتى مەن ونىڭ ايماقتىق فيليالدارى قىزمەتكەرلەرىنە ونلاين-سەمينارلار وتكىزدى. باعدارلاما كاسىبي بىلىكتىلىكتى ارتتىرۋعا جانە جەراستى سۋ رەسۋرستارىن زەرتتەۋ، باقىلاۋ مەن ۇتىمدى پايدالانۋدىڭ زاماناۋي حالىقارالىق تاسىلدەرىمەن تانىسۋعا باعىتتالعان.
«سەمينارلار سەرياسى بارىسىندا قاتىسۋشىلار جەراستى سۋلارىنىڭ جاي-كۇيىن باقىلاۋ، باعالاۋ جانە سيفرلىق مودەلدەۋدىڭ زاماناۋي ادىستەرىن، سونداي-اق سۋ رەسۋرستارىن ءتيىمدى باسقارۋ ماسەلەلەرىن زەردەلەدى. سونىمەن قاتار، اقش گەولوگيالىق قىزمەتىنىڭ ساراپشىلارى ءارتۇرلى ەلدەردە سۋ قورلارىن تۇراقتى پايدالانۋدى قامتاماسىز ەتۋ ءۇشىن قولدانىلاتىن گيدروگەولوگيا سالاسىنداعى وزىق الەمدىك تاجىريبەلەردى ۇسىندى»، — دەپ حابارلادى قازاقستاننىڭ سۋ مينيسترلىگى.
وقۋ قورىتىندىسى بويىنشا اقش گەولوگيالىق قىزمەتى «قازگيدروگەولوگيا» مەن ونىڭ فيليالدارى ماماندارى اراسىنان باعدارلامانىڭ 20 بەلسەندى قاتىسۋشىسىنا سەرتيفيكاتتار تابىس ەتتى. حالىقارالىق سەرتيفيكاتتار باعدارلامانى ءساتتى مەڭگەرۋ مەن ءبىلىم بەرۋ ءىس-شارالارىنا بەلسەندى قاتىسۋدى راستادى. سونىمەن قاتار، بىرلەسكەن باعدارلامانى ۇيىمداستىرۋ مەن ىسكە اسىرۋعا قاتىسقان مينيسترلىكتىڭ جەراستى سۋلارى دەپارتامەنتى مەن ستراتەگيالىق دامۋ دەپارتامەنتى قىزمەتكەرلەرىنە جەكە العىس سەرتيفيكاتتارى بەرىلدى.
«قازگيدروگەولوگيا» ۇلتتىق گيدروگەولوگيالىق قىزمەتىنىڭ باسقارما ءتوراعاسى بولات بەكنياز سالانى ودان ءارى دامىتۋ ءۇشىن حالىقارالىق ىنتىماقتاستىقتىڭ ماڭىزدىلىعىن اتاپ ءوتتى. «سۋ رەسۋرستارى جانە يرريگاسيا مينيسترلىگى اقش گەولوگيالىق قىزمەتىنە جەمىستى ىنتىماقتاستىعى جانە جەراستى سۋ رەسۋرستارىن زەرتتەۋ مەن باسقارۋ سالاسىنداعى قازاقستاندىق مامانداردىڭ بىلىكتىلىگىن ارتتىرۋعا قولداۋ كورسەتكەنى ءۇشىن العىس بىلدىرەدى. ءبىز حالىقارالىق ارىپتەستەرىمىزبەن وزىق تاجىريبە الماسۋ جانە بىرلەسىپ كادرلار دايارلاۋ باعىتىندا ىنتىماقتاستىقتى جالعاستىرامىز»، — دەدى بەكنياز.
مينيسترلىكتە كاسىبي قۇزىرەتتەردى دامىتۋ مەن حالىقارالىق تاجىريبەنى ەنگىزۋ باسىم باعىتتار بولىپ قالاتىنىن اتاپ ءوتتى. الىنعان ءبىلىم مەن زاماناۋي ادىستەمەلەردى قازاقستاننىڭ جەراستى سۋ رەسۋرستارىن ودان ءارى زەرتتەۋ، باقىلاۋ جانە باسقارۋدا پايدالانۋ جوسپارلانۋدا، بۇل ستراتەگيالىق ماڭىزدى سۋ قورلارىن ءتيىمدى ءارى تۇراقتى پايدالانۋعا ىقپال ەتەدى.