قازاقستان الەمنىڭ ەڭ باسەكەگە قابىلەتتى ەكونوميكالارىنىڭ حالىقارالىق رەيتينگىندە 38-ورىنعا جايعاسىپ، تمد ەلدەرىنىڭ ىشىنەن وسى تىزىمگە ەنگەن جالعىز مەملەكەت اتاندى. بۇل تۋرالى IMD World Competitiveness Center جاريالاعان جاھاندىق زەرتتەۋ قورىتىندىسىندا ايتىلادى، دەپ حابارلايدى infohub.kz سايتى.
شۆەيساريالىق IMD World Competitiveness Center ورتالىعىنىڭ جىل سايىنعى زەرتتەۋى الەمنىڭ 70 ەلىنىڭ ەكونوميكاسىن ءتورت نەگىزگى باعىت بويىنشا باعالايدى: ەكونوميكالىق كورسەتكىشتەر، ۇكىمەت تيىمدىلىگى، بيزنەس تيىمدىلىگى جانە ينفراقۇرىلىم.
اعىمداعى تىزىمدە قازاقستان 65.4 بالل جيناپ، 38-ورىنعا تۇراقتادى.
رەيتينگتىڭ باسىندا الەمنىڭ جەتەكشى 10 ەلى ورنالاستى: سينگاپۋر (100 بالل)، گونكونگ (95.6 بالل)، شۆەيساريا (95.3 بالل)، تايۆان (94.3 بالل)، بىرىككەن اراب امىرلىكتەرى (94.1 بالل)، دانيا (94.1 بالل)، يرلانديا (94.1 بالل)، نيدەرلاند (90.1 بالل)، شۆەسيا (88.5 بالل) جانە امەريكا قۇراما شتاتتارى (86.8 بالل).
وسى جاھاندىق تىزىمدە قازاقستان ءوز كورسەتكىشتەرىنىڭ ارقاسىندا يسپانيا، پورتۋگاليا، پولشا، يتاليا جانە ارگەنتينا سياقتى ءبىرقاتار مەملەكەتتى باسىپ وزدى.
ەلدىڭ ءتورت نەگىزگى باعىت بويىنشا جەكە پروفايلىندا مىناداي كورسەتكىشتەر تىركەلگەن: ۇكىمەت تيىمدىلىگى (Government Efficiency) بويىنشا قازاقستان 63.0 بالل جيناپ، 23-ورىنعا تۇراقتادى. بيزنەس تيىمدىلىگى (Business Efficiency) باعىتىندا ەل 66.5 بالل ناتيجەسىمەن 23-ورىندى يەلەندى.
سونىمەن قاتار ينفراقۇرىلىم (Infrastructure) كورسەتكىشى 46.2 باللدى قۇراپ، بۇل سالادا ەل 43-ورىنعا جايعاستى، ال ەكونوميكالىق كورسەتكىشتەر (Economic Performance) باعىتى بويىنشا 43.5 باللمەن 57-ورىنعا بەكىدى.
زەرتتەۋ اياسىندا قازاقستاننىڭ نەگىزگى ماكروەكونوميكالىق كورسەتكىشتەرى دە ۇسىنىلدى: جالپى ىشكى ءونىم (ءجىو) كولەمى 306.2 ميلليارد دوللاردى قۇراپ، بۇل كورسەتكىش بويىنشا ەل 44-ورىنعا تۇراقتادى.
ساتىپ الۋ قابىلەتىنىڭ پاريتەتى (ساقپ) بويىنشا جان باسىنا شاققانداعى ءجىو 45 286.3 دوللارعا جەتىپ، 43-ورىندى يەلەندى. ەلدىڭ ءجىو ناقتى ءوسىمى 6.5%-دى قۇراپ، بۇل كورسەتكىش بويىنشا ەل 6-ورىنعا جايعاستى.
بۇعان قوسا حالىق سانى 20.4 ميلليون ادامدى (32-ورىن)، جۇمىسسىزدىق دەڭگەيى 4.6%-دى (31-ورىن)، ال تۇتىنۋ باعالارىنىڭ ينفلياسياسى 11.4%-دى (65-ورىن) قۇرادى.
بۇعان دەيىن «كۋرسيۆ» حالىقارالىق S&P Global Ratings اگەنتتىگى قازاقستاننىڭ بانك جۇيەسىنە بەرگەن باعاسىن جاقسارتقانىن جازعان بولاتىن. ساراپشىلار قازاقستاندىق بانكتەر سەنىمدىرەك بولعانىن، ال ولارعا قاتىستى باقىلاۋ كورشى ەلدەرمەن سالىستىرعاندا قاتاڭ ءارى تيىمدىرەك ەكەنىن اتاپ ءوتتى.