قازاقستاندا سيفرلىق كريميناليستيكا سالاسىندا ماماندار دايارلاۋعا باعىتتالعان جاڭا ءبىلىم بەرۋ باعدارلاماسى باستالدى. ەلىمىزدىڭ كۇش قۇرىلىمدارى جۇيەسىندە العاش رەت وقۋ ەكى ديپلوم الۋدى كوزدەيتىن باعدارلاما بويىنشا وتەدى، دەپ حابارلايدى infohub.kz سايتى.
باعدارلاماعا ق ر ءىىم باسقارۋ اكادەمياسىنىڭ 20 ماگيسترانتى قاتىسۋدا. كۋرس اياسىندا ولار سيفرلىق كريميناليستيكا، كيبەرقاۋىپسىزدىك، سوت ساراپتاماسى جانە قىلمىستاردى تەرگەۋدىڭ زاماناۋي ادىستەرىن مەڭگەرەدى.
جوبانى ءىىم باسقارۋ اكادەمياسى ءۇندىستاننىڭ ۇلتتىق سوت عىلىمدارى ۋنيۆەرسيتەتىمەن (NFSU) بىرلەسىپ، پرەزيدەنت اكىمشىلىگىنىڭ تاپسىرماسى بويىنشا جانە عىلىم جانە جوعارى ءبىلىم مينيسترلىگىنىڭ قولداۋىمەن جۇزەگە اسىرۋدا.
وقۋدى اياقتاعان سوڭ تۇلەكتەر ەكى ۋنيۆەرسيتەتتىڭ دە ديپلومىن الادى. سونىمەن قاتار، قازاقستاندىق ماماندار حالىقارالىق تاجىريبە الىپ، سيفرلىق ورتاداعى قىلمىستاردى تەرگەۋدە پايدالى بولاتىن پراكتيكالىق داعدىلارعا يە بولا الادى.
NFSU سوت ساراپتاماسى، كريمينولوگيا، سيفرلىق كريميناليستيكا جانە كيبەرقاۋىپسىزدىككە ماماندانعان.
باعدارلامانىڭ رەسمي ىسكە قوسىلۋىنا ءىىم ءمينيسترىنىڭ مىندەتىن اتقارۋشى ەرجان سادەنوۆ، عىلىم جانە جوعارى ءبىلىم ءمينيسترىنىڭ مىندەتىن اتقارۋشى ساياسات نۇربەك، سونداي-اق ءۇندىستاندىق ۋنيۆەرسيتەت پەن ءىىم باسقارۋ اكادەمياسىنىڭ وكىلدەرى قاتىستى.