2026 جىلدىڭ ءبىرىنشى جارتىجىلدىعىندا جەكە كاسىپكەرلەر جاساعان اكىمشىلىك قۇقىقبۇزۋشىلىقتاردىڭ جارتىسىنان كوبى ايىپپۇل سالۋمەن اياقتالدى. قازاقستان رەسپۋبليكاسى باس پروكۋراتۋراسىنىڭ قۇقىقتىق ستاتيستيكا جانە ارنايى ەسەپكە الۋ كوميتەتىنىڭ دەرەكتەرىنە سايكەس، اقشالاي ءوندىرىپ الۋ ۇلەسى رەكوردتىق 52%-عا جەتتى، دەپ حابارلايدى infohub.kz سايتى.
ستاتيستيكا كورسەتكەندەي، 2023 جىلدان باستاپ جەكە كاسىپكەرلەرگە تاعايىندالاتىن اكىمشىلىك جازالار سانى انىقتالعان قۇقىقبۇزۋشىلىقتار سانىنىڭ ازايۋىنا بايلانىستى قىسقارۋدا. الايدا وسى كەزەڭدە جازا قۇرىلىمى ايتارلىقتاي وزگەردى.
وتكەن جىلدىڭ ءبىرىنشى جارتىجىلدىعىندا اكىمشىلىك قۇقىقبۇزۋشىلىقتاردىڭ تەك 31،6%-ى ايىپپۇلمەن اياقتالسا، 2026 جىلدىڭ قاڭتار–ماۋسىم ايلارىندا اقشالاي ءوندىرىپ الۋ 52% جاعدايدا تاعايىندالعان. وسىلايشا، ءقازىر جك جاساعان ءاربىر ەكىنشى بۇزۋشىلىق ايىپپۇلعا اكەپ سوعادى.
سونىمەن قاتار، ايىپپۇلداردىڭ جالپى اكىمشىلىك جازالار قۇرىلىمىنداعى ۇلەسى قاراستىرىلىپ وتىرعان كەزەڭدەگى ەڭ جوعارى دەڭگەيگە جەتتى. ال ەسكەرتۋلەر سانى جىل سايىن ازايىپ كەلەدى، كەرىسىنشە اقشالاي ءوندىرىپ الۋلار سانى ارتۋدا.
زەرتتەۋدە اتاپ وتىلگەندەي، بيزنەس وكىلدەرى مۇنداي ءۇردىستى فيسكالدىق جۇكتەمەنىڭ كۇشەيۋى رەتىندە ءجيى قابىلدايدى.
اكىمشىلىك ىستەردىڭ جالپى سانىنىڭ ازايۋىنا قاراماستان، ايىپپۇلدار سانىنىڭ ارتۋى ەسەبىنەن كاسىپكەرلەرگە قارجىلىق قىسىم كۇشەيىپ وتىر.
جەكە كاسىپكەرلەرگە سالىنعان اكىمشىلىك ايىپپۇلداردىڭ جالپى سوماسى سالىستىرمالى تۇردە تۇراقتى بولىپ، جىلىنا 5،1-دەن 7،9 ملرد تەڭگەگە دەيىن قۇرايدى. 2026 جىلدىڭ العاشقى التى ايىندا كاسىپكەرلەرگە جالپى سوماسى 3،2 ملرد تەڭگە كولەمىندە ايىپپۇل سالىندى، بۇل وتكەن جىلدىڭ سايكەس كەزەڭىمەن سالىستىرعاندا 10،8%-عا ارتىق.
دەگەنمەن، بارلىق ەسەپتەلگەن سومالاردى ءوندىرىپ الۋ مۇمكىن ەمەس. ستاتيستيكا بويىنشا، سالىنعان ايىپپۇلداردىڭ شامامەن 60–65%-ى عانا ناقتى تولەنەدى.
بۇل ايىرماشىلىق كاسىپكەرلەردىڭ ءبىر بولىگى ايىپپۇلداردى جەڭىلدەتىلگەن تارتىپپەن وتەۋىمەن، ال باسقالارى سوتتا شەشىمگە شاعىمدانۋىمەن نەمەسە تولەمدەردىڭ ماجبۇرلەپ وندىرىلۋىمەن تۇسىندىرىلەدى.