قازاقستانداعى ءۇي شارۋاشىلىقتارىنىڭ تومەن جانە ورتاشادان تومەن دەڭگەيدە قامتاماسىز ەتىلۋىنىڭ باستى سەبەبى — تومەن جالاقى، دەپ حابارلايدى infohub.kz.
ۇلتتىق ستاتيستيكا بيۋروسىنىڭ زەرتتەۋىنە سايكەس، رەسپوندەنتتەردىڭ 62،1%-ى قارجىلىق جاعدايىنىڭ ناشارلىعىن ەڭبەكاقىنىڭ جەتكىلىكسىزدىگىمەن بايلانىستىرعان.
ەكىنشى ورىندا — تومەن زەينەتاقى، بۇل سەبەپتى 33% رەسپوندەنت اتاعان. تاعى 20،3% تۇرعىلىقتى جەرى بويىنشا تۇراقتى اقىلى جۇمىس تابا المايتىنىن ايتقان.
باسقا فاكتورلار قاتارىندا قازاقستاندىقتار كەز كەلگەن اقىلى جۇمىستىڭ بولماۋىن (14،9%)، بىلىكتىلىك نەمەسە جۇمىس تاجىريبەسىنىڭ جەتكىلىكسىزدىگىن (12،7%)، سونداي-اق لايىقتى جۇمىسقا ورنالاسۋ ءۇشىن ءبىلىم دەڭگەيىنىڭ جەتكىلىكسىزدىگىن (11،5%) اتاعان.
رەسپوندەنتتەردىڭ شامامەن 11%-ى قارجىلىق جاعدايىنىڭ سەبەبىن الەۋمەتتىك جاردەماقىلاردىڭ تومەندىگىمەن بايلانىستىرسا، 9،5%-ى دەنساۋلىعىنىڭ ناشارلىعىن، ال 9،2%-ى نەسيەلەر مەن قارىزدار، ونىڭ ىشىندە يپوتەكا بويىنشا جوعارى قارىز جۇكتەمەسىن اتاعان.
زەرتتەۋگە قاتىسۋشىلار بالاباقشاعا بارمايتىن مەكتەپ جاسىنا دەيىنگى بالالارعا كۇتىم جاساۋ قاجەتتىلىگىن (1،5%)، توتەنشە جاعدايلار مەن تابيعي اپاتتاردى (1%) جانە باسقا دا سەبەپتەردى (0،7%) الدەقايدا سيرەك اتاعان.
زەرتتەۋ قالا جانە اۋىل تۇرعىندارى اراسىنداعى ايىرماشىلىقتاردى دا كورسەتتى. قالالاردا تومەن قامتاماسىز ەتىلۋدىڭ سەبەبى رەتىندە تومەن زەينەتاقى ءجيى اتالدى (50،1% قالادا، 18،8% اۋىلدا). اۋىلدىق جەرلەردە، كەرىسىنشە، تۇرعىلىقتى جەرى بويىنشا تۇراقتى جۇمىس تابا الماۋ (25،5% اۋىلدا، 14% قالادا) جانە كەز كەلگەن اقىلى جۇمىستىڭ بولماۋى (22،2% اۋىلدا، 6،2% قالادا) ءجيى كورسەتىلگەن.
سونىمەن قاتار، ەر ادامدار ايەلدەرگە قاراعاندا تومەن قامتاماسىز ەتىلۋدى تومەن جالاقىمەن ءجيى بايلانىستىرعان — 75،5% ەرلەردە، 54،9% ايەلدەردە. ال ايەلدەر تومەن زەينەتاقىنى (39،9% ايەلدەردە، 20،2% ەرلەردە) جانە الەۋمەتتىك جاردەماقىلاردىڭ تومەندىگىن (12،2% ايەلدەردە، 8،8% ەرلەردە) ءجيى اتاعان.
ايتا كەتەيىك، قازاقستان حالقىنىڭ ناقتى تابىسى ءبىرىنشى جارتىجىلدىقتا نەبارى 0،1%-عا وسكەن، دەگەنمەن ۇلتتىق ەكونوميكا مينيسترلىگى مۇنداي ناتيجەنىڭ ءوزىن وڭ دەپ سانايدى.