قازاقستاننىڭ ىشكى نارىعىندا وتاندىق قۇرىلىس ماتەريالدارى وندىرۋشىلەرىنىڭ ۇلەسى 70%-دان استى، دەپ حابارلايدى infohub.kz.
ونەركاسىپ جانە قۇرىلىس مينيسترلىگىندە اتاپ وتكەندەي، بيىل سالانى دامىتۋعا 202،2 ملرد تەڭگە بولىنبەك. قۇرىلىس سالاسى ەلدىڭ ءجىو-نىڭ 6%-ىن قۇرايدى، ال ءبىرىنشى جارتىجىلدىقتاعى قۇرىلىس جۇمىستارىنىڭ كولەمى 4،1 ترلن تەڭگەنى قۇراپ، وتكەن جىلدىڭ سايكەس كەزەڭىمەن سالىستىرعاندا 15،2%-عا ءوستى. 2025 جىلى بۇل كورسەتكىش 10،7 ترلن تەڭگەگە جەتىپ، 2024 جىلمەن سالىستىرعاندا 17،5%-عا ارتتى.
سالا دامۋىنىڭ ماڭىزدى كەزەڭى قۇرىلىس كودەكسىنىڭ كۇشىنە ەنۋى بولدى. جاڭا نورمالار وبەكتىلەردى پايدالانۋدىڭ كەپىلدىك مەرزىمدەرىن ۇلعايتۋدى، جوبالاۋ كەزىندە سەيسميكالىق تاۋەكەلدەردى مىندەتتى تۇردە ەسەپكە الۋدى، قۇرىلىس ۇيىمدارىن سيفرلىق باقىلاۋدى، سونداي-اق بۇزۋشىلىقتارعا جەدەل دەن قويۋدى كوزدەيدى.
نارىقتىڭ قۇرىلىس ماتەريالدارىنا دەگەن قاجەتتىلىگىن 3 مىڭنان استام كاسىپورىن قامتاماسىز ەتەدى. مينيسترلىكتە ناقتىلاعانداي: «بيىل 48 ينۆەستيسيالىق جوبانى ىسكە اسىرۋ جوسپارلانۋدا، بۇل 3،5 مىڭنان استام جاڭا جۇمىس ورنىن قۇرۋعا مۇمكىندىك بەرەدى». سالادا 380 مىڭنان استام مامان ەڭبەك ەتەدى. قۇرىلىسشىلار، ساۋلەتشىلەر، جوبالاۋشىلار مەن ينجەنەرلەردىڭ ارقاسىندا قازاقستاننىڭ زاماناۋي كەلبەتىن قالىپتاستىراتىن اۋقىمدى جوبالار جۇزەگە اسىرىلۋدا.
بۇعان دەيىن «كۋرسيۆ» قازاقستاننىڭ بارلىق وڭىرىندە قۇرىلىس قۇنى تومەندەگەنىن، ءبىراق سەمەنت باعاسى 5%-عا وسكەنىن جازعان بولاتىن.