قازاقستاندا ءبىرقاتار باعىتتار بويىنشا جاڭا تۇراقتى اۋە رەيستەرىن اشۋ جوسپارلانۋدا، بۇل ەلدەر اراسىنداعى كولىك قولجەتىمدىلىگىن ايتارلىقتاي كەڭەيتەدى. ازاماتتىق اۆياسيا سالاسىنداعى ىنتىماقتاستىقتى كەڭەيتۋ ماسەلەلەرى ق ر كولىك ۆيسە-مينيسترى تالعات لاستاەۆتىڭ قىتايلىق Urumqi Airlines اۋەكومپانياسىنىڭ ۆيسە-پرەزيدەنتى چجان ليانمەن كەزدەسۋىندە تالقىلاندى، دەپ حابارلايدى infohub.kz.
كەلىسسوزدەر بارىسىندا جۇڭگو تاراپى ءۇرىمشى – قاراعاندى، قۇلجا (ينينگ) – استانا جانە قۇلجا (ينينگ) – الماتى باعىتتارى بويىنشا جاڭا تۇراقتى رەيستەردى ىسكە قوسۋ جوسپارلارىن ايتتى. قازاقستان تاراپى ءوز كەزەگىندە وسكەمەن جانە سەمەي قالالارىمەن اۋە قاتىناسىن اشۋ مۇمكىندىگىن قاراستىرۋدى، ال بولاشاقتا زايسان جانە كاتونقاراعايداعى جاڭا وڭىرلىك اۋەجايلارمەن بايلانىس ورناتۋدى ۇسىندى. بۇل جوسپارلاردىڭ ىسكە اسۋى ءتۋريزمنىڭ دامۋىنا، كولىك قولجەتىمدىلىگىنىڭ ارتۋىنا جانە ەكى ەل اراسىنداعى ساۋدا-ەكونوميكالىق بايلانىستاردىڭ نىعايۋىنا ىقپال ەتەدى.
كەزدەسۋدە قازاقستاندا Urumqi Airlines قولداناتىن قىتايلىق COMAC C909 اۋە كەمەلەرىن پايدالانا وتىرىپ، وڭىرلىك اۋەكومپانيا قۇرۋ بويىنشا بىرلەسكەن جوبانىڭ پەرسپەكتيۆالارىنا ەرەكشە نازار اۋدارىلدى. تاراپتار بۇل ۇشاقتاردى زايسان، كاتونقاراعاي جانە تۋريستىك الەۋەتى بار باسقا دا قالالارعا باعىتتاردى قوسا العاندا، وڭىرلىك تاسىمالداۋ ءۇشىن پايدالانۋ مۇمكىندىگىن تالقىلادى.
كەزدەسۋ قورىتىندىسى بويىنشا تاراپتار ازاماتتىق اۆياسيا سالاسىنداعى ىنتىماقتاستىقتى ودان ءارى دامىتۋعا جانە بىرلەسكەن جوبالاردى ىسكە اسىرۋعا ءوزارا قىزىعۋشىلىقتارىن راستادى.