2025 جىلدىڭ قورىتىندىسى بويىنشا «قازاقستان-قىتاي قۇبىرى» (ققق) كومپانياسىنىڭ تازا پايداسى 26%-عا تومەندەپ، 27 ملرد تەڭگەنى قۇرادى. بۇل وتكەن جىلعى 36،5 ملرد تەڭگەدەن ايتارلىقتاي از. كومپانيا اتاسۋ – الاشانكوۋ جانە كەنكياق – قۇمكول مۇناي قۇبىرلارىنىڭ وپەراتورى بولىپ تابىلادى، دەپ حابارلايدى infohub.kz.
كومپانيانىڭ تابىسى دا 13،3%-عا ازايىپ، 87،9 ملرد تەڭگەدەن 76،2 ملرد تەڭگەگە دەيىن تومەندەدى. وپەراسيالىق پايدا 43،4 ملرد تەڭگەدەن 29،2 ملرد تەڭگەگە دەيىن قىسقاردى. ال قارجىلىق كىرىستەر ەكى ەسەدەن استام ءوسىپ، 2024 جىلعى 3،2 ملرد تەڭگەدەن 6،4 ملرد تەڭگەگە جەتتى.
ققق تەڭ دارەجەدە ۇلتتىق وپەراتور «قازترانسويل» مەن قىتايلىق CNODC كومپانياسىنا تيەسىلى. ءدال وسى CNODC 2025 جىلدان باستاپ ەنەرگەتيكا مينيسترلىگىنىڭ بۇيرىعىن سوتتا داۋلاپ كەلەدى. بۇل بۇيرىق رەسەي مۇنايىن قازاقستان ارقىلى قىتايعا تاسىمالداۋ تاريفتەرىن وزگەرتكەن.
2025 جىلدىڭ 1 مامىرىنان باستاپ اتاسۋ – الاشانكوۋ ۋچاسكەسىندەگى تاريف تونناسىنا 10،77 دوللاردان 7،76 دوللارعا دەيىن (ققس-سىز) تومەندەتىلدى. Energy Monitor Telegram-ارناسىنىڭ مالىمەتىنشە، وسى شەشىمنىڭ سالدارىنان ققق جىلىنا شامامەن 30 ملن دوللار تابىس تاپپاي قالۋى مۇمكىن، ونىڭ شامامەن 15 ملن دوللارى قىتايلىق اكسيونەردىڭ ۇلەسىنە تيەدى.
2025 جىلدىڭ شىلدەسىندە CNODC ەنەرگەتيكا مينيسترلىگىنىڭ بۇيرىعىن جارامسىز دەپ تانۋدى سوتتان سۇراعان، الايدا تالاپ قايتارىلدى. سودان كەيىن كومپانيا مينيسترلىكتىڭ ارەكەتتەرىنە قارسى جاڭا وتىنىشتەر بەردى. 2026 جىلدىڭ اقپانىندا سوت CNODC تالاپتارىن ءىشىنارا قاناعاتتاندىرىپ، ەنەرگەتيكا مينيسترلىگىن ءتاريفتى قايتا قاراۋعا بايلانىستى ماتەريالداردى كومپانياعا ۇسىنۋعا مىندەتتەدى.
كەيىن جۇڭگو تاراپى ەنەرگەتيكا مينيسترلىگىنىڭ بۇيرىعىن كۇشىن جويۋدى تالاپ ەتىپ، قايتادان سوتقا جۇگىندى. ىسكە ءۇشىنشى تۇلعا رەتىندە «قازترانسويل» مەن ققق تارتىلدى.
قۇبىر كومپانياسىنىڭ ەسەپتىلىگىندە اتاپ وتىلگەندەي، قازىرگى ۋاقىتتا CNODC مەن ەنەرگەتيكا مينيسترلىگى اراسىندا تاراپتاردى تاتۋلاستىرۋ تۋرالى كەلىسىم جوباسىن كەلىسۋ راسىمدەرى ءجۇرىپ جاتىر. وسى جىلدىق قارجىلىق ەسەپتىلىك بەكىتىلگەن كۇنگە دەيىن سوت ءىسىنىڭ ناتيجەسى بەلگىسىز.