قازاقستان ورتالىق ازياداعى العاشقى ەل رەتىندە جاڭا Li L9 Livisء-تى ياندەكس اۆتو پلاتفورماسىمەن نارىققا شىعاردى. ەندى ناۆيگاسيا، مۋزىكا، فيلمدەر جانە باسقا سەرۆيستەر سمارتفوندى قوسپاي-اق، ءاۆتوموبيلدىڭ شتاتتىق ەكرانىندا جۇمىس ىستەيدى، دەپ infohub.kz سايتى حابارلايدى.
جاڭارتىلعان Li L9-دىڭ العاشقى شەتەلدىك پرەمەراسىن كومپانيا الماتىدا وتكىزدى. ساۋىردەگى بەيجىڭ اۆتوسالونىنداعى دەبيۋتتەن كەيىن فلاگماندىق كروسسوۆەر ءۇش اي ىشىندە قازاقستان نارىعىنا جەتتى.
Livis نۇسقاسىنىڭ باستى ەرەكشەلىگى – ياندەكستىڭ ەكوجۇيەسىنىڭ ءاۆتوموبيلدىڭ مۋلتيمەديالىق جۇيەسىنە تەرەڭ ينتەگراسياسى. جۇرگىزۋشىلەرگە ياندەكس كارتالار، مۋزىكا، جانارماي بەكەتتەرى، كىتاپتار جانە ۆيدەو قىزمەتتەرى تەلەفونسىز جانە قوسىمشا قولدانباسىز قولجەتىمدى. ياندەكس كارتالار كەپتەلىستەردى ەسكەرە وتىرىپ باعىت سالادى، جول كامەرالارى مەن جوندەۋ جۇمىستارى تۋرالى ەسكەرتەدى، ال قاجەت بولسا، وفلاين كارتالاردىڭ ارقاسىندا ينتەرنەتسىز دە جۇمىس ىستەيدى. ياندەكس جانارماي بەكەتتەرى ارقىلى جول بويىنداعى ءججم-دى تاۋىپ، وتىندى ونلاين تولەۋگە بولادى – ءبارى ماشينادان شىقپاي-اق.
ساپار كەزىندە جۇرگىزۋشى مەن جولاۋشىلار «مەنىڭ تولقىنىم» جەكە ۇسىنىستارىمەن مۋزىكا تىڭداپ، اۋديوكىتاپتاردى تىڭداۋعا، سونداي-اق كينوپويسك فيلمدەرىن، سەريالدارىن، مۋلتفيلمدەرىن نەمەسە ياندەكس ۆيدەو ارقىلى ينتەرنەتتەگى بەينەجازبالاردى كورۋگە مۇمكىندىك الادى. ياندەكس ID ارقىلى اۆتوريزاسيادان وتكەن سوڭ، اۆتوموبيل ساقتالعان مەكەنجايلاردى، سۇيىكتى اندەردى، پلەيليستەردى جانە قاراۋ تاريحىن اۆتوماتتى تۇردە تارتىپ الادى. ەگەر فيلم نەمەسە اۋديوكىتاپ ۇيدە باستالعان بولسا، ونى جولدا جالعاستىرۋعا بولادى.
سيفرلىق ەكوجۇيەدەن بولەك، Li L9 تاعى دا باسقا جاڭارتۋلارعا يە بولدى. سىرتقى كەلبەتىنەن ونى Maybach ستيلىندەگى ەكى ءتۇستى كۋزوۆ بوياۋىنان تانۋعا بولادى. ساتىپ الۋشىلار ءۇشىن مودەلدىڭ پرەميۋم مارتەبەسىن كورسەتەتىن ءتورت ءتۇس كومبيناسياسى دايىندالدى. التى ورىندى فلاگمان جالپى قۋاتى 571 ات كۇشى بار تىزبەكتى گيبريدتى قوندىرعىمەن جانە 72،7 كۆت·س اككۋمۋلياتورمەن جابدىقتالعان. ەلەكترمەن جۇرگەندە 350 كم-گە دەيىن جۇرەدى، ال جالپى ءجۇرىس قورى 1 370 كم-گە جەتەدى. ورتاشا وتىن شىعىنى 100 كم-گە 6،6 ليتر دەپ كورسەتىلگەن.
ەڭ كوزگە تۇسەتىن «فيشكالار» – 800 ۆولتتى ارحيتەكتۋراداعى بەلسەندى اسپا، باسقارىلاتىن ارتقى دوڭگەلەكتەر، ليدار جانە اۆتوماتتى اپاتتى تەجەۋدى قوسا العاندا زاماناۋي جۇرگىزۋشىگە كومەك كورسەتۋ جۇيەلەرى. جاڭا كونسترۋكسيانىڭ ارقاسىندا بۇرىلۋ راديۋسى شامامەن ءبىر مەترگە قىسقاردى. سالون دا ايتارلىقتاي وزگەردى. كروسسوۆەر ۇلكەن پانورامالىق ەكرانعا، الدىڭعى جانە ەكىنشى قاتارعا ارنالعان Zero Gravity كرەسلولارىنا، -6 گرادۋسقا دەيىن مۇزداتۋ فۋنكسياسى بار توڭازىتقىشقا، كولەمدى دىبىس شىعاراتىن اۋديوجۇيەگە، بارلىق ەسىكتەردىڭ ەلەكتر جەتەگىنە جانە اۆتوماتتى كۇڭگىرتتەنەتىن ارتقى تەرەزەلەرگە يە بولدى. حالىقارالىق نۇسقا ءۇشىن ورىس جانە اعىلشىن تىلدەرىندەگى ينتەرفەيس دايىندالدى، ال ءاۆتوموبيلدى ەندى قىتايلىق SIM-كارتاسىز، ەلەكتروندى پوشتا ارقىلى تىركەۋگە بولادى.
قازاقستاندا جاڭا Li L9 ەكى جيىنتىقتا ۇسىنىلدى. Ultra نۇسقاسى 44 ملن تەڭگەگە باعالانسا، Livis 51،9 ملن تەڭگە تۇرادى. الدىن الا تاپسىرىستار ءقازىردىڭ وزىندە اشىق، ال تولىققاندى ساتىلىم تامىزدا باستالادى. ياندەكس اۆتو ينتەگراسياسى كومپانيانىڭ قازاقستانداعى اۆتوموبيل سەرۆيستەرىن دامىتۋداعى كەلەسى قادامى بولدى. شىلدە ايىنىڭ باسىندا ياندەكس Go قوسىمشاسىندا Qazaq Energy Charge جەلىسىنىڭ ستانسيالارىندا ەلەكتروموبيلدەردى زاريادتاۋدى ىزدەۋ، باستاۋ جانە تولەۋ مۇمكىندىگى پايدا بولدى. كوكتەمدە Yandex Qazaqstan وكىلدەرى ياندەكس اۆتو پلاتفورماسى مەن «اليسا» داۋىستىق كومەكشىسىن قازاقستان نارىعىنا ارنالعان اۆتوموبيلدەرگە بىرىكتىرۋ جوسپارلارى تۋرالى ايتقان بولاتىن. Li L9 Livisء-تىڭ شىعۋى وسىنداي ىنتىماقتاستىقتىڭ العاشقى رەسمي مىسالى بولدى.