قازاقستاندىقتار مالايزياعا كىرۋ كەزىندە ءجيى باس تارتۋعا تاپ بولۋدا. سەبەپتەرىن ق ر سىرتقى ىستەر مينيسترلىگىنىڭ رەسمي وكىلى جانبولات ۋسەنوۆ ايتىپ بەردى، دەپ حابارلايدى infohub.kz سايتى.
جانبولات ۋسەنوۆتىڭ ايتۋىنشا، قازاقستان ازاماتتارىنىڭ مالايزياعا كىرۋىنە ءجيى باس تارتۋ ۆيزاسىز رەجيم شارتتارىن ساقتاماۋمەن بايلانىستى. ول قازاقستاندىقتار تۋريستىك ماقساتتا مالايزيادا ۆيزاسىز 30 كۇنگە دەيىن بولا الاتىنىن ەسكە سالدى.
«دەگەنمەن، كەيبىر ازاماتتار بۇل رەجيمنىڭ شارتتارىن بۇزىپ، ەلگە ۇزاق مەرزىمگە نەمەسە وزگە ماقساتتارمەن، ونىڭ ىشىندە قىسقا مەرزىمدى وقۋ كۋرستارىنان ءوتۋ نەمەسە ەمدەلۋ ءۇشىن كىرەدى»، — دەدى ق ر ءسىم رەسمي وكىلى.
ول 30 كۇندىك مەرزىمدى اينالىپ ءوتۋ ءۇشىن «ۆيزاران» (visa run) دەپ اتالاتىن ءادىس قولدانىلاتىنىن ايتتى: بۇل — كورشى مەملەكەتكە قىسقا ۋاقىتقا شىعىپ، 30 كۇندىك مەرزىمدى جاڭارتۋ ءۇشىن مالايزياعا دەرەۋ قايتا ورالۋ.
«ەلدە بولۋ مەرزىمىن ۇزارتۋدىڭ مۇنداي ءتاسىلى ەلدىڭ يمميگراسيالىق زاڭناماسىن بۇزۋ بولىپ تابىلاتىنىن جانە ەلگە قايتا كىرۋگە كەپىلدىك بەرمەيتىنىن ەسكەرتەمىز. بيىل مالايزيا بيلىگى شەكارالىق باقىلاۋدى كۇشەيتتى. شەتەل ازاماتىن ەل اۋماعىنا كىرگىزۋ تۋرالى شەشىمدى مالايزيانىڭ يمميگراسيالىق ورگاندارى تىكەلەي پاسپورتتىق باقىلاۋدان ءوتۋ كەزىندە قابىلدايدى. „ۆيزاران“ جاساۋ ارەكەتى كەزىندە ازامات ۇستالىپ، اۋەجايداعى يمميگراسيالىق ورتالىققا ورنالاستىرىلىپ، كەيىن مالايزيادان دەپورتاسيالانۋى مۇمكىن»، — دەپ ەسكەرتتى ۋسەنوۆ.
ق ر ءسىم ازاماتتاردى ۆيزاسىز بولۋدىڭ بەلگىلەنگەن مەرزىمدەرى مەن شارتتارىن قاتاڭ ساقتاۋعا، يمميگراسيالىق تالاپتاردى الدىن الا ناقتىلاۋعا جانە ساپار ماقساتىن ەسكەرۋگە شاقىرادى.
«يمميگراسيالىق باقىلاۋدان ءوتۋ كەزىندە ساپاردىڭ ناقتى ماقساتىن كورسەتۋ جانە زاڭدى بولۋدىڭ بەلگىلەنگەن مەرزىمدەرى ىشىندە ەلدەن كەيىنگى ۇشۋعا الدىن الا ساتىپ الىنعان اۋەبيلەتتەردى، سونداي-اق ساپاردىڭ ماقساتىن، ورنىن جانە بولجامدى مەرزىمىن راستايتىن قۇجاتتاردى وزىڭىزدە مىندەتتى تۇردە بولۋى قاجەت»، — دەدى ۆەدومستۆو وكىلى.
جانبولات ۋسەنوۆ تىلدىك جانە وزگە دە ءبىلىم بەرۋ باعدارلامالارىنان ءوتۋ ءۇشىن بالالارمەن شەتەلگە شىعاتىن ازاماتتارعا ەرەكشە نازار اۋدارۋ كەرەكتىگىن اتاپ ءوتتى، ويتكەنى بۇل ءتيىستى رۇقساتتاردى رەسىمدەۋدى تالاپ ەتۋى مۇمكىن.