2027 جىلعى 1 قاڭتاردان باستاپ قازاقستاندا مەملەكەتتىك قىزمەتشىلەر ءۇشىن جەكە مۇددەلەر تۋرالى دەكلاراسيانى تولتىرۋدىڭ جاڭا ەرەجەلەرى ەنگىزىلەدى. ءتيىستى ۇكىمەت قاۋلىسى 2026 جىلعى 20 تامىزدا بەكىتىلدى، دەپ حابارلايدى infohub.kz سايتى.
دەكلاراسيانى جاۋاپتى مەملەكەتتىك لاۋازىمداردى اتقاراتىن، مەملەكەتتىك فۋنكسيالاردى ورىنداۋعا ۋاكىلەتتىك بەرىلگەن ادامدار، لاۋازىمدى تۇلعالار، سونداي-اق ولارعا تەڭەستىرىلگەن ادامدار مىندەتتى تۇردە تاپسىرۋى ءتيىس. بۇل قىزمەتكە كىرىسكەننەن نەمەسە قىزمەت بويىنشا اۋىسقاننان كەيىن 15 جۇمىس كۇنى ىشىندە جاسالۋى كەرەك.
جاڭا تالاپتار ەرەجەلەر كۇشىنە ەنگەننەن كەيىن تۋىنداعان قۇقىقتىق قاتىناستارعا عانا قولدانىلادى. وسىلايشا، 2027 جىلعى 1 قاڭتارعا دەيىن بولعان وقيعالار بويىنشا دەكلاراسيا تاپسىرۋ قاجەت بولمايدى.
دەكلاراسيادا جاقىن تۋىستار، جۇبايى (زايىبى)، جەگجاتتار جانە دەكلارانتپەن بىرگە ءبىر مەملەكەتتىك ورگاندا، ۇيىمدا نەمەسە كۆازيمەملەكەتتىك سەكتور سۋبەكتىسىندە جۇمىس ىستەيتىن باسقا دا بايلانىستى ادامدار تۋرالى مالىمەتتەردى كورسەتۋ قاجەت بولادى. سونداي-اق پەداگوگيكالىق، عىلىمي، شىعارماشىلىق جانە وزگە دە اقىلى قىزمەت، قازاقستاندا جانە شەتەلدە كوممەرسيالىق ۇيىمدارعا قاتىسۋ، جەكە كاسىپكەرلىك (ونىڭ ىشىندە لاۋازىمعا كىرىسكەنگە دەيىنگى ءبىر جىل ىشىندە)، سونداي-اق مەنشىكتى م ۇلىكتى سەنىمگەرلىك باسقارۋعا بەرۋ تۋرالى حابارلاۋ قاجەت.
ۇيىمداستىرۋشىلىق-وكىمدىك نەمەسە اكىمشىلىك-شارۋاشىلىق فۋنكسيالاردى ورىندايتىن ادامدار ءۇشىن قوسىمشا تالاپتار قاراستىرىلعان. ولار جاقىن تۋىستارى، جۇبايى (زايىبى) نەمەسە جەگجاتتارى يەلىك ەتەتىن نەمەسە باسقارۋىنا قاتىساتىن كومپانيالار تۋرالى، ەگەر بۇل كومپانيالار دەكلارانت جۇمىس ىستەيتىن مەملەكەتتىك ورگانمەن، ۇيىممەن نەمەسە كۆازيمەملەكەتتىك سەكتور سۋبەكتىسىمەن ازاماتتىق-قۇقىقتىق قاتىناستاردا بولسا، مالىمەتتەردى اشۋى ءتيىس.
دەكلاراسيانى تاپسىرماعانى نەمەسە ونى تاپسىرۋ مەرزىمدەرىن بۇزعانى ءۇشىن تارتىپتىك جاۋاپكەرشىلىك قاراستىرىلعان. دەكلاراسيالاردى جيناۋدى مەملەكەتتىك ورگانداردىڭ، ۇيىمداردىڭ جانە كۆازيمەملەكەتتىك سەكتور سۋبەكتىلەرىنىڭ كادر قىزمەتتەرى جۇزەگە اسىرادى. اگەنتتىكتە جاڭا تەتىك مۇددەلەر قاقتىعىسىنىڭ الدىن الۋ جانە ۋاقىتىلى انىقتاۋ ءۇشىن ەنگىزىلەتىنىن اتاپ ءوتتى.
بۇعان دەيىن الماتى قالاسى بويىنشا مەملەكەتتىك كىرىستەر دەپارتامەنتى 2026 جىلعى قىركۇيەكتە سالىق ەسەپتىلىگىن تاپسىرۋ مەرزىمدەرىن ەسكە سالعانى حابارلانعان بولاتىن. 15 قىركۇيەككە دەيىن، اتاپ ايتقاندا، 250.00 نىسانى بويىنشا اكتيۆتەر مەن مىندەتتەمەلەر تۋرالى دەكلاراسيانى جانە 2025 جىل ءۇشىن 270.00 نىسانى بويىنشا كىرىستەر مەن م ۇلىك تۋرالى دەكلاراسيانى ۇسىنۋ قاجەت. سونىمەن قاتار، قىركۇيەك ىشىندە سالىق تولەۋشىلەر جتس، كتس، ققس، اكسيزدەر، الەۋمەتتىك سالىق جانە باسقا دا مىندەتتى تولەمدەردى تولەۋى ءتيىس. مەرزىمدەردىڭ ەڭ كوپ سانى 25 قىركۇيەككە كەلەدى، ونىڭ ىشىندە 270.00 نىسانى بويىنشا جتس جانە تامىز ايى ءۇشىن الەۋمەتتىك تولەمدەردى تولەۋ.