قازاقستان ۇكىمەتى پسيحيكالىق دەنساۋلىقتى قورعاۋ جۇيەسىندەگى اۋقىمدى رەفورمانى جاريالادى. 2027–2030 جىلدارعا ارنالعان جاڭا كەشەندى جوسپار سالداردى ەمدەۋدەن پروفيلاكتيكاعا، ەرتە انىقتاۋعا جانە بارلىق كەزەڭدەردە سۇيەمەلدەۋگە كوشۋدى كوزدەيدى، دەپ حابارلايدى infohub.kz سايتى.
جوبانى ۇكىمەتتە ۆيسە-پرەمەر – مادەنيەت جانە اقپارات ءمينيسترى ايدا بالاەۆانىڭ توراعالىعىمەن وتكەن كەڭەستە قاراستىردى.
دەنساۋلىق ساقتاۋ ءمينيسترى اقمارال ءالنازاروۆا: «بۇگىندە مامانداندىرىلعان كومەكتى ەكى رەسپۋبليكالىق كلينيكا، 20 وڭىرلىك پسيحيكالىق دەنساۋلىق ورتالىعى، 98 العاشقى مەديسينالىق كومەك ورتالىعى جانە اۋىلدىق جەرلەردەگى 200-دەن استام پسيحيكالىق دەنساۋلىق كابينەتى كورسەتەدى. جۇرگىزىلگەن تالداۋ قىزمەتتى ودان ءارى دامىتۋ قاجەتتىگىن كورسەتتى. جاڭا كەشەندى جوسپار پسيحيكالىق دەنساۋلىق ماماندارىن ەمحانالار جۇمىسىنا ينتەگراسيالاۋدى، ەرتە دياگنوستيكانى دامىتۋدى، پاسيەنتتىڭ مارشرۋتىن سيفرلاندىرۋدى، كادرلىق الەۋەتتى نىعايتۋدى جانە ينفراقۇرىلىمدى جاڭارتۋدى كوزدەيدى. بالالار مەن جاسوسپىرىمدەرگە ەرەكشە نازار اۋدارىلادى»، – دەدى.
جوسپاردى ازىرلەۋ اياسىندا سالالىق ۆەدومستۆولار عىلىمي زەرتتەۋلەردى دامىتۋ، ماماندار دايارلاۋدى جەتىلدىرۋ، ءبىلىم بەرۋ باعدارلامالارىن جاڭارتۋ، پەداگوگتار مەن پسيحولوگتاردىڭ بىلىكتىلىگىن ارتتىرۋ، سونداي-اق مۇگەدەكتىگى بار بالالار مەن ەرەسەكتەرگە ارنالعان ارناۋلى الەۋمەتتىك قىزمەتتەر مەن ينفراقۇرىلىم جۇيەسىن ودان ءارى دامىتۋ بويىنشا ۇسىنىستار بەردى.
مينيسترلىكتەر مەن اكىمدىكتەردىڭ باياندامالارىنان كەيىن 2027–2030 جىلدارعا ارنالعان پسيحيكالىق دەنساۋلىقتى قورعاۋدىڭ كەشەندى جوسپارى بەكىتىلدى.