وپەك+ قۇرامىنداعى جەتى ەل قازان ايىندا مۇناي ءوندىرۋ كولەمىن قىركۇيەكتەگى جوسپار دەڭگەيىندە ساقتاۋ تۋرالى شەشىم قابىلدادى. بۇل تۋرالى 6 قىركۇيەكتە وتكەن ۆيرتۋالدى كەزدەسۋدە بەلگىلى بولدى، دەپ حابارلايدى ۇيىمنىڭ سايتى.
كەزدەسۋگە ساۋد ارابياسى، رەسەي، يراك، كۋۆەيت، قازاقستان، الجير جانە ومان وكىلدەرى قاتىستى. بۇعان دەيىن بۇل ەلدەر 2023 جىلدىڭ ساۋىرىندە جانە قاراشاسىندا قوسىمشا ەرىكتى تۇزەتۋلەر جاسايتىندارىن مالىمدەگەن بولاتىن.
«6 قىركۇيەكتە وپەك+ قۇرامىنداعى جەتى ەل — ساۋد ارابياسى، رەسەي، يراك، كۋۆەيت، قازاقستان، الجير جانە ومان — الەمدىك نارىقتىڭ جاي-كۇيى مەن دامۋ پەرسپەكتيۆالارىن تالقىلاۋ ءۇشىن ۆيرتۋالدى كەزدەسۋ وتكىزدى. جەتى ەل 2026 جىلعى قىركۇيەكتەگى جوسپاردى ورىنداۋ ءۇشىن قاجەتتى ءوندىرىس كولەمىن قازان ايىندا ساقتاۋ تۋرالى شەشىم قابىلدادى»، — دەلىنگەن حابارلامادا.
وسىلايشا، قازان ايىندا كەلىسىمگە قاتىسۋشىلار قىركۇيەكتەگى جوسپاردا كوزدەلگەن ءوندىرىس دەڭگەيىن ۇستانۋدى جالعاستىرادى.
قىركۇيەكتە قازاقستان مۇناي ءوندىرۋدى تامىزبەن سالىستىرعاندا تاۋلىگىنە 10 مىڭ باررەلگە ارتتىردى. ءوندىرىس كولەمى تاۋلىگىنە 1،628 ملن باررەلدى قۇرادى.
جەتى مەملەكەت ىنتىماقتاستىق تۋرالى دەكلاراسيانى تولىق ساقتاۋعا ۇجىمدىق مىندەتتەمەلەرىن راستادى. قاتىسۋشىلار الەمدىك مۇناي نارىعىنىڭ جاي-كۇيى مەن پەرسپەكتيۆالارىن باعالاۋ ءۇشىن اي سايىن كەزدەسۋلەر وتكىزۋدى جالعاستىرادى. وپەك+ قۇرامىنداعى جەتى ەلدىڭ كەلەسى كەزدەسۋى 4 قازانعا جوسپارلانعان.