قازاقستاندا مەديسينالىق قىزمەتتەرگە قوسىلعان قۇن سالىعىن (ققس) تولىق الىپ تاستاۋ مۇمكىندىگى تالقىلانۋدا. مۇنداي باستامامەن «اتامەكەن» ۇلتتىق كاسىپكەرلەر پالاتاسىنىڭ باسقارما ءتوراعاسى قانات شارلاپايەۆ شىعىپ، بارلىق دارىلىك زاتتار مەن مەديسينالىق بۇيىمدارعا ءبىرىڭعاي 5% ققس مولشەرلەمەسىن بەلگىلەۋدى، ال مەديسينالىق قىزمەتتەردى سالىقتان تولىق بوساتۋدى ۇسىندى، دەپ حابارلايدى infohub.kz سايتى.
بۇل ماسەلە جاڭا سالىق كودەكسىن ەنگىزۋ جونىندەگى جوبالىق كەڭسەنىڭ وتىرىسىندا قارالدى. شارلاپاەۆتىڭ ايتۋىنشا، ەكونوميكالىق ىنتىماقتاستىق جانە دامۋ ۇيىمىنا (ەىدۇ) مۇشە ەلدەردىڭ كوپشىلىگىندە مەديسينالىق قىزمەتتەر ققس-قا جاتپايدى. بيزنەس-قوعامداستىق سالانى سالىق سالۋدىڭ ءارتۇرلى نۇسقالارىن تالقىلاعاننان كەيىن وسىنداي ۇسىنىس جاسادى.
قازىرگى ۋاقىتتا جاڭا سالىق كودەكسى دەنساۋلىق ساقتاۋ سالاسىنداعى ققس مولشەرلەمەلەرىن كەزەڭ-كەزەڭمەن وزگەرتۋدى كوزدەيدى. مەديسينالىق قىزمەتتەر مەن دارىلىك زاتتار، تەگىن مەديسينالىق كومەكتىڭ كەپىلدىك كولەمى (تمككك) جانە مىندەتتى الەۋمەتتىك مەديسينالىق ساقتاندىرۋ (ءمامس) جۇيەسى اياسىندا كورسەتىلەتىندەر سالىقتان تولىق بوساتىلعان. جەڭىلدىك 3 مىڭنان استام دارىلىك پرەپارات اتاۋىنا قولدانىلادى.
سونىمەن قاتار، سيرەك كەزدەسەتىن جانە الەۋمەتتىك ماڭىزى بار اۋرۋلاردى دياگنوستيكالاۋ، ەمدەۋ، الدىن الۋ جانە وڭالتۋ بويىنشا مەديسينالىق قىزمەتتەرگە ققس سالىنبايدى. سونداي-اق تمككك جانە ءمامس اياسىندا پرەپاراتتار ءوندىرۋ ءۇشىن قولدانىلاتىن فارماسەۆتيكالىق سۋبستانسيالاردىڭ يمپورتى سالىقتان بوساتىلعان.
قالعان دارىلەر مەن مەديسينالىق بۇيىمدار ءۇشىن جەڭىلدىكتى ققس مولشەرلەمەسى قولدانىلادى: 2026 جىلدىڭ قاڭتارىنان باستاپ ول 5% قۇرايدى، ال 2027 جىلدىڭ 1 قاڭتارىنان باستاپ 10%-عا دەيىن ءوسۋى ءتيىس.
وتىرىستا ءارتۇرلى مولشەرلەمەلەردى قولدانۋ اكىمشىلەندىرۋدى قيىنداتاتىنى اتاپ ءوتىلدى. سوندىقتان سالا وكىلدەرى دارىلىك زاتتار مەن مەديسينالىق بۇيىمدارعا ءبىرىڭعاي مولشەرلەمە ەنگىزۋ ماسەلەسىن بىرنەشە رەت كوتەرگەن.
تالقىلاۋعا قاتىسۋشىلار پاندەميا كەزىندەگى تاجىريبە سالىقتان بوساتۋدىڭ ءوزى مەديسينالىق قىزمەتتەردىڭ، دارىلەر مەن مەديسينالىق بۇيىمداردىڭ قۇنىنا اسەر ەتپەيتىنىن كورسەتكەنىن اتاپ ءوتتى. سوندىقتان سالىق رەجيمىندەگى كەز كەلگەن وزگەرىستەر ولاردىڭ بيۋدجەتكە، نارىققا جانە حالىق ءۇشىن مەديسينالىق كومەكتىڭ قولجەتىمدىلىگىنە اسەرىن قوسىمشا باعالاۋدى تالاپ ەتەدى.
وتىرىس قورىتىندىسى بويىنشا تاراپتار ىقتيمال سالدارلاردى ەگجەي-تەگجەيلى تالداعاننان كەيىن بۇل ماسەلەگە قايتا ورالۋدى ۇيعاردى.