قازاقستان ەنەرگەتيكا مينيسترلىگى كاسپي قۇبىر كونسورسيۋمىنىڭ (كتك) مۇناي قابىلداۋدى ۋاقىتشا شەكتەگەنىن جانە كەيبىر كولەمدەردى بالامالى باعىتتارعا قايتا باعىتتاعانىن حابارلادى، دەپ مالىمدەيدى infohub.kz سايتى.
ۆەدومستۆونىڭ ناقتىلاۋىنشا، شىلدە ايىندا مۇنايدىڭ ءبىر بولىگى اقتاۋ پورتى، اتاسۋ – الاشانكوۋ باعىتى جانە اتىراۋ – سامارا باعىتى سياقتى باسقا باعىتتارعا جىبەرىلگەن. قوسىمشا نۇسقالار رەتىندە باكۋ – تبيليسي – دجەيحان جۇيەسى، كاسپي تەڭىزى ارقىلى ءازىربايجان اۋماعىمەن تاسىمالداۋ، سونداي-اق باكۋ – سۋپسا باعىتى قاراستىرىلۋدا.
مينيسترلىكتىڭ دەرەگىنشە، باكۋ – تبيليسي – دجەيحان جۇيەسى ارقىلى ءقازىردىڭ وزىندە جىلىنا شامامەن 1،2 ملن توننا قازاقستاندىق مۇناي تاسىمالدانادى. ءازىربايجان تاراپى قابىلداۋدى جىلىنا 2،2 ملن تونناعا دەيىن ارتتىرۋعا دايىن ەكەنىن ءبىلدىردى.
ەسكە سالايىق، 30 شىلدەدە كتك ءباسپاسوز قىزمەتى تەڭىز تەرمينالىنىڭ اكۆاتورياسىندا تانكەرگە جاسالعان شابۋىلدى تەرروريستىك دەپ اتاپ، بۇل تۋرالى مالىمدەگەن بولاتىن. مارشالل ارالدارىنىڭ تۋىن كوتەرگەن Niffos Sifnos تانكەرى زارداپ شەكتى، ونىڭ جۇك جونەلتۋشىسى «تەڭىزشەۆرويل» ج ش س بولىپ تابىلادى. وقيعا مۇناي تيەۋ كەزىندە الىس ورنالاسقان قۇرىلعىدا بولعان. كەيىن جاعدايعا قازاقستان ەنەرگەتيكا مينيسترلىگى تۇسىنىكتەمە بەردى.