قازاقستان قۇراماسى حالىقارالىق پاندىك وليمپيادالارعا قاتىسۋ تاريحىنداعى ەڭ ۇزدىك ناتيجەلەردىڭ ءبىرىن كورسەتتى. ەلىمىزدىڭ جاس عالىمدارى بيولوگيا جانە حيميا بويىنشا ءىرى الەمدىك جارىستاردا جەتى مەدال جەڭىپ الدى، دەپ حابارلايدى infohub.kz سايتى.
12-19 شىلدە ارالىعىندا ۆيلنيۋستە (ليتۆا) وتكەن 37ء-شى حالىقارالىق بيولوگيا وليمپياداسىندا (IBO-2026) قازاقستان قۇراماسى ءۇش كۇمىس جانە ءبىر قولا مەدال الدى. بۇل ناتيجە 1996 جىلى قول جەتكىزىلگەن ۇلتتىق كوماندانىڭ ۇزدىك جەتىستىگىن قايتالاۋ بولدى. وليمپياداعا 84 ەلدەن 330-تان استام وقۋشى قاتىستى، ولار كۇردەلى تەوريالىق تاپسىرمالاردى شەشىپ، زەرتحانالىق پراكتيكۋمداردى ورىندادى.
كۇمىس مەدالداردى: قايىركەن ەرسۇلتان (11 سىنىپ، پاۆلودار وبلىسىنىڭ دارىندى ۇلدارعا ارنالعان «ءبىلىم-يننوۆاسيا» ليسەي-ينتەرناتى)، اشيرحانوۆ ءاليحان (9 سىنىپ، الماتى قالاسىنىڭ مامانداندىرىلعان «ءبىلىم-يننوۆاسيا» ليسەي-ينتەرناتى)، جەلتوۆا سوفيا (11 سىنىپ، الماتى-مەدەۋ NIS) جەڭىپ الدى. قولا مەدالدى مەجەنينا ەۆگەنيا (11 سىنىپ، قاراعاندى قالاسىنداعى NIS) الدى. كوماندانىڭ جاتتىقتىرۋشىلارى مەن جەتەكشىلەرى ءلايلا اسكاروۆا، يلياس ساكيموۆ، كاميليا سادىكوۆا جانە دىنمۇحاممەد ۇرازبايەۆ بولدى.
قازاقستاندىق وقۋشىلار تاشكەنتتە (وزبەكستان) وتكەن حالىقارالىق حيميا وليمپياداسىندا (IChO-2026) كەم ەمەس اسەرلى ناتيجە كورسەتتى. ءتورت قاتىسۋشىنىڭ ءبارى جۇلدەگەر اتاندى: ءبىر التىن جانە ءۇش كۇمىس مەدال. التىندى وسكەمەن قالاسىنداعى NIS وقۋشىسى جەڭىسحانوۆا ايزەرە (11 سىنىپ) الدى. كۇمىس جۇلدەگەرلەر: استانا قالاسى نۇرا اۋدانىنداعى NIS وقۋشىسى كالي ءابىلمانسۇر (11 سىنىپ)، الماتى قالاسىنداعى №134 ليسەي وقۋشىسى پولەتايەۆ دانيل (11 سىنىپ)، استانا قالاسىنداعى Spectrum International School وقۋشىسى جاقسىلىقوۆ انسار (11 سىنىپ). حيميا وليمپياداسىنا 90-نان استام ەلدەن 350-دەن استام وقۋشى قاتىستى، جارىس تەوريالىق جانە پراكتيكالىق كەزەڭدەردەن تۇردى.