قازاقستاندا 25 قىركۇيەك كاسپي تەڭىزىندەگى وقۋ-جاتتىعۋ كەزىندە قازا تاپقان اسكەري قىزمەتشىلەردى ەسكە الۋ كۇنى بولىپ جاريالاندى. ءتيىستى جارلىققا قازاقستان پرەزيدەنتى قاسىم-جومارت توقايەۆ قول قويدى، دەپ حابارلايدى infohub.kz سايتى.
قايعىلى وقيعا 24 قىركۇيەكتە ماڭعىستاۋ وبلىسىندا بولدى. قازاقستان رەسپۋبليكاسى قارۋلى كۇشتەرىنىڭ اسكەري-تەڭىز كۇشتەرى وقۋ-جاۋىنگەرلىك تاپسىرمانى ورىنداپ جاتقاندا، كاسپي تەڭىزىنىڭ جاعالاۋىندا اۋا رايى كۇرت ناشارلاپ، جەل كۇشەيدى — اسكەري قىزمەتشىلەردى تەڭىزگە الىپ كەتتى.
العاشىندا تەڭىزدە 19 اسكەري قىزمەتشى بولعانى، ونىڭ توعىزى قازا تاپقانى حابارلاندى. الايدا 24 قىركۇيەك كەشكە شىن مانىندە تەڭىزگە 17 ادام الىپ كەتكەنى بەلگىلى بولدى: ولاردىڭ 12ء-سى قازا تاپتى، ۇشەۋىن قۇتقارۋ مۇمكىن بولدى. تاعى ەكى اسكەري قىزمەتشىنى ىزدەۋ جالعاسۋدا.
قورعانىس مينيسترلىگى وقۋ-جاتتىعۋ كەزىندە قازا تاپقانداردىڭ ءتىزىمىن جاريالادى. وعان 11 ماتروس جانە ءبىر اعا لەيتەنانت ەندى.
باس پروكۋراتۋرا اسكەري قىزمەتشىلەردىڭ قازا بولۋىنا قاتىستى اقتاۋ گارنيزونىندا قىلمىستىق ءىس قوزعالىپ، تەرگەلىپ جاتقانىن مالىمدەدى. قايعىلى وقيعادان كەيىن ۇكىمەتتىك كوميسسيا قۇرىلىپ، توتەنشە جاعداي ورنىنا پرەمەر-مينيستردىڭ ورىنباسارى قانات بوزىمبايەۆ جىبەرىلدى.
پرەزيدەنت قاسىم-جومارت توقايەۆ ماڭعىستاۋ وبلىسىنداعى اسكەري قىزمەتشىلەردىڭ قازا بولۋىنا بايلانىستى كوڭىل ايتىپ، قايعىلى وقيعانى تەرگەۋ جونىندە تاپسىرمالار بەردى. اقتاۋدا قالا كۇنىنە وراي مەرەكەلىك ءىس-شارالار توقتاتىلدى.
سونىمەن قاتار قانات بوزىمبايەۆ بارلىق كىنالى لاۋازىمدى تۇلعالار «ارەكەتى نەمەسە ارەكەتسىزدىگى» ءۇشىن جازالاناتىنىن ۋادە ەتتى. ب ا ق سونداي-اق كەيبىر قازا تاپقانداردىڭ دەموبيليزاسياعا دەيىن ساناۋلى كۇن قالعانىن ءبىلدى.