قازاقستان ءوز اۋماعىندا شەتەل مەملەكەتتەرىنىڭ دەرەكتەرىن ورنالاستىرۋعا مۇمكىندىك بەرەتىن اۋقىمدى جوبانى جۇزەگە اسىرۋعا دايىندالۋدا، دەپ حابارلايدى infohub.kz.
پرەمەر-مينيستر ولجاس بەكتەنوۆ پاۆلودار وبلىسىنداعى «دەرەكتەردى وڭدەۋ ورتالىقتارى القابى» (Data Center Valley) جوباسىنىڭ ىسكە اسۋ قارقىنىنا ارنالعان كەڭەس وتكىزدى. قازىرگى ۋاقىتتا قۋاتى 50 مۆت بولاتىن العاشقى نىساننىڭ قۇرىلىسى بەلسەندى كەزەڭدە. جىل سوڭىنا دەيىن دەرەكتەر ورتالىعى مەن ەنەرگوبلوكتاردىڭ نەگىزگى كورپۋستارىن، اكىمشىلىك-تۇرمىستىق كەشەندى، باقىلاۋ-وتكىزۋ پۋنكتتەرىن جانە سىرتقى ينجەنەرلىك جەلىلەردىڭ ءبىر بولىگىن سالۋ جوسپارلانۋدا. ىسكە قوسۋ جۇمىستارى 2027 جىلدىڭ مامىرىندا اياقتالىپ، نىسان 2027 جىلدىڭ ماۋسىمىندا پايدالانۋعا بەرىلەدى.
ۇكىمەتتىڭ مالىمەتىنشە، بۇل جوبا حالىقارالىق گيپەرسكەيلەرلەردىڭ دەرەكتەردى وڭدەۋ ورتالىقتارىن، AI-فابريكالاردى، GPU-كلاستەرلەردى جانە بۇلتتىق پلاتفورمالاردى ورنالاستىرۋعا ارنالعان ماسشتابتالاتىن الاڭ بولىپ تابىلادى. ونى ىسكە اسىرۋ قازاقستاندا سيفرلىق ەكونوميكانىڭ ەكسپورتقا باعىتتالعان جاڭا سەكتورىن قۇرىپ، وتاندىق جاساندى ينتەللەكت شەشىمدەرىن ازىرلەۋگە ارنالعان IT-ينفراقۇرىلىمدى قامتاماسىز ەتەدى.
«Data Center Valley قازاقستاننىڭ جاڭا ەكسپورتتىق الەۋەتىن قالىپتاستىرادى. ەسەپتەۋ قۋاتتارىن ەل ىشىندە ورنالاستىرا وتىرىپ، ءبىز وتاندىق AI-شەشىمدەردى دامىتۋعا، جاھاندىق كومپانيالاردى تارتۋعا جانە قازاقستاننىڭ حالىقارالىق سيفرلىق قىزمەتتەر نارىعىنا شىعۋىنا جاعداي جاسايمىز»، — دەپ اتاپ ءوتتى پرەمەر-مينيستردىڭ ورىنباسارى — جاساندى ينتەللەكت جانە سيفرلىق دامۋ ءمينيسترى جاسلان مادييەۆ.
جوبا اياسىندا قوسىمشا IT-قۋاتتاردى قۇرۋ ءۇشىن ءبىرقاتار شەتەلدىك كومپانيالارمەن ىنتىماقتاستىق پىسىقتالۋدا. كەلىسسوزدەر جاڭا ينۆەستورلار مەن ياكور كليەنتتەردى تارتۋدى، جوعارى ءونىمدى ەسەپتەۋ كلاستەرلەرىن ورنالاستىرۋدى جانە بۇلتتىق قىزمەتتەردى دامىتۋدى قامتيدى.
سونىمەن قاتار، ەلدە Cloud First Policy (Data Embassy) جوباسىنا دايىندىق ءجۇرىپ جاتىر. بۇل جوبا قازاقستاندا شەتەل مەملەكەتتەرىنىڭ دەرەكتەرىن ولاردىڭ تولىق زاڭدى ەگەمەندىگىن ساقتاي وتىرىپ ورنالاستىرۋ مۇمكىندىگىن قاراستىرادى.