قاراعاندى وبلىسىندا پوليسەيلەر العاش رەت جاساندى ينتەللەكتىمەن جابدىقتالعان ءروبوت-يتتى قىزمەتكە قوستى. ول توبىر ىشىنەن ءتورت قۇقىق بۇزۋشىنى تابۋعا كومەكتەستى. infohub.kz Polisia.kz-كە سىلتەمە جاساپ حابارلاعانداي، ەكى كۇندىك جۇمىس بارىسىندا جاڭا تەحنولوگيا بۇقارالىق ءىس-شارالار كەزىندە ءتورت ادامدى انىقتادى. روبوتتى بالقاش پەن تەمىرتاۋداعى مەتاللۋرگ كۇنىن مەرەكەلەۋدە سىناقتان وتكىزدى.
17–18 شىلدەدە وتكەن شارالارعا 115 مىڭنان استام ادام قاتىستى. قاۋىپسىزدىكتى قامتاماسىز ەتۋ ءۇشىن پوليسيا جەكە قۇرامدى كۇشەيتىلگەن رەجيمگە كوشىرىپ، 1 مىڭنان اسا قىزمەتكەردى تارتتى.
پوليسيانىڭ اقپاراتتىق بازاسىمەن ينتەگراسيالانعان روبوت-يت ناقتى ۋاقىت رەجيمىندە ادامداردىڭ بەتىن تاني الادى. بۇل ىزدەۋلى جۇرگەن ازاماتتاردى تەزىرەك انىقتاۋعا جانە قۇقىق بۇزۋشىلىقتاردىڭ الدىن الۋعا مۇمكىندىك بەرەدى.
قىزمەت بارىسىندا روبوت ءتورت ادامدى تاپتى: اليمەنت تولەمەگەن بورىشكەر، مەملەكەت الدىندا قارىزى بار ەكى ازامات جانە سوت ۇيدەن تىس جۇرۋگە تىيىم سالعان بۇرىن سوتتالعان ەر ادام. بارلىق قۇقىق بۇزۋشىلارعا زاڭدا كوزدەلگەن شارالار قولدانىلدى.
سونىمەن قاتار پوليسەيلەر 3 پەن 17 جاس ارالىعىنداعى جوعالعان 87 بالانى تاۋىپ، اتا-انالارىنا قايتاردى.
پوليسيا روبوتتى تەحنولوگيالاردى قولدانۋ ىشكى ىستەر ورگاندارىن سيفرلىق ترانسفورماسيالاۋدىڭ كەزەكتى كەزەڭى ەكەنىن اتاپ ءوتتى. ۆەدومستۆونىڭ پىكىرىنشە، مۇنداي شەشىمدەر قوعامدىق ءتارتىپتى قورعاۋ تيىمدىلىگىن ارتتىرىپ، ازاماتتاردىڭ قاۋىپسىزدىگىن جاڭا دەڭگەيدە قامتاماسىز ەتۋگە مۇمكىندىك بەرەدى.
بۇعان دەيىن پوليسيا روبوتتارى استانانىڭ ساۋدا ورتالىقتارى مەن ۆوكزالدارىندا، ال روبوت-يتتەر اقتاۋ كوشەلەرىندە پاترۋلدىك قىزمەت اتقاراتىنى حابارلانعان بولاتىن.