قازاقستان سىرتقى ىستەر ءمينيسترى ەرمەك قوشەربايەۆ رۋمىنيا ءسىم باسشىسىنىڭ مىندەتىن اتقارۋشى وانا سويۋمەن تەلەفون ارقىلى سويلەستى. تاراپتار كاسپي قۇبىر كونسورسيۋمىنىڭ (كتك) جۇمىسىنا ءقاۋىپ توندىرەتىن كەز كەلگەن ارەكەتتى ايىپتادى، دەپ حابارلايدى infohub.kz.
اڭگىمە بارىسىندا ەكىجاقتى قاتىناستار ءۇشىن ستراتەگيالىق ماڭىزى بار ەنەرگەتيكالىق ىنتىماقتاستىققا ەرەكشە نازار اۋدارىلدى. سۇحباتتاستار قازاقستاندىق مۇنايدىڭ الەمدىك نارىققا ەكسپورتىن قامتاماسىز ەتۋدە شەشۋشى ءرول اتقاراتىن كتك اينالاسىنداعى جاعدايدى تالقىلادى.
تاراپتار ەنەرگەتيكالىق ينفراقۇرىلىمنىڭ تۇراقتى جۇمىسىنىڭ ستراتەگيالىق ماڭىزدىلىعىن جانە ەۋروپالىق نارىققا كومىرسۋتەكتەردىڭ سەنىمدى جەتكىزىلۋىن اتاپ ءوتىپ، كتك ينفراقۇرىلىمىنىڭ جۇمىسىنا جانە ەنەرگيا جەتكىزۋ قاۋىپسىزدىگىنە ءقاۋىپ توندىرەتىن كەز كەلگەن ارەكەتتى ايىپتادى.
سىرتقى ساياسي ۆەدومستۆولاردىڭ باسشىلارى قازاقستان مەن رۋمىنيانىڭ ەنەرگەتيكا سالاسىنداعى پراكتيكالىق ءوزارا ءىس-قيمىلىن ودان ءارى دامىتۋعا ءوزارا قىزىعۋشىلىقتارىن اتاپ ءوتتى. وانا سويۋ ەرمەك قوشەرباەۆتى رۋمىنياعا رەسمي ساپارمەن كەلۋگە شاقىردى.