جاڭا وقۋ جىلى قارساڭىندا قازاقستاندىق مەكتەپتەر وقۋشىلاردىڭ تاماقتانۋىن ۇيىمداستىرۋعا قويىلاتىن جاڭارتىلعان تالاپتاردى ەنگىزۋگە دايىندالۋدا. ءبىلىم بەرۋ ۇيىمدارىنىڭ دايىندىعى مەن جاڭا ستاندارتتىڭ ساقتالۋى تۋرالى ورتالىق كوممۋنيكاسيالار قىزمەتىندە وتكەن بريفينگتە باس مەملەكەتتىك سانيتارلىق دارىگەر سارحات بەيسەنوۆا ايتىپ بەردى، دەپ حابارلايدى infohub.kz سايتى.
بەيسەنوۆانىڭ ايتۋىنشا، قازىرگى ۋاقىتتا وقۋشىلاردىڭ تاماقتانۋىنىڭ ساپاسى مەن قاۋىپسىزدىگىنە ەرەكشە نازار اۋدارىلۋدا. 2025 جىلدىڭ 1 قىركۇيەگىنەن باستاپ ءبىلىم بەرۋ ۇيىمدارىندا جاڭا تاماقتانۋ ستاندارتى كۇشىنە ەنەدى. ول تاعامدارداعى قانت مولشەرىن 3،6 ەسەگە، تۇزدى 5 ەسەگە ازايتۋدى كوزدەيدى. سونداي-اق كوكونىستەر، جەمىستەر جانە ءسۇت ونىمدەرىنىڭ ۇلەسى ارتادى، ال مازىردەن شۇجىق ونىمدەرى، ىستالعان ەت، سپرەدتەر جانە قۇرامىندا قانت پەن تۇز كوپ باسقا دا ونىمدەر تولىعىمەن الىنىپ تاستالادى. قۇرامىندا قانت بار سۋسىندار مەن شىرىندار سۋ، ءسۇت جانە اشىتىلعان ءسۇت سۋسىندارىمەن اۋىستىرىلادى.
بۇل وزگەرىستەردىڭ باستى ماقساتى — بالالاردىڭ سالاۋاتتى تاماقتانۋ راسيونىن قالىپتاستىرۋ جانە سەمىزدىك، قانت ديابەتى، جۇرەك-قان تامىرلارى جانە باسقا دا سوزىلمالى اۋرۋلاردىڭ دامۋ ءقاۋپىن ازايتۋ.
بۇعان دەيىن بيىلعى جىلدىڭ ماۋسىم ايىندا سانيتارلىق دارىگەرلەر وتاندىق مەكتەپتەردە اۋقىمدى تەكسەرۋ جۇرگىزىپ، سانيتارلىق-ەپيدەميولوگيالىق تالاپتاردىڭ ءارتۇرلى بۇزۋشىلىقتارىن انىقتاعانى حابارلانعان بولاتىن. ولاردىڭ كوپشىلىگى — 2087ء-ى — مەكتەپتەردىڭ اس بلوگتارىنان تابىلعان. اتاپ ايتقاندا، اسحانالاردىڭ قاناعاتتانارلىقسىز سانيتارلىق-تەحنيكالىق جاعدايى، سونداي-اق اس بلوكتارىنىڭ تەحنولوگيالىق جانە توڭازىتقىش جابدىقتارمەن ناشار جاراقتاندىرىلۋى انىقتالدى. مۇنداي بۇزۋشىلىقتاردىڭ ەڭ كوپ سانى تۇركىستان وبلىسىندا (259)، قاراعاندى وبلىسىندا (163)، الماتىدا (123) جانە قىزىلوردا وبلىسىندا (115) تىركەلدى.