نازاربايەۆ ۋنيۆەرسيتەتىنىڭ BULAN كومانداسى گونكونگتە وتكەن ABU Robocon 2026 حالىقارالىق روبوتوتەحنيكا چەمپيوناتىندا Mabuchi Motor Award ارنايى سىيلىعىن جەڭىپ الدى، دەپ حابارلايدى infohub.kz سايتى.
عىلىم جانە جوعارى ءبىلىم مينيسترلىگىندەگىلەردىڭ ايتۋىنشا، جارىسقا 21 ەلدىڭ ۋنيۆەرسيتەت كوماندالارى قاتىستى.
«Mabuchi Motor Award ينجەنەرلىك شەشىمدەردىڭ وزىندىك ەرەكشەلىگى، مەحانيكالىق قۇرىلىم ساپاسى جانە مەحانيكالىق، ەلەكتروندىق جانە باعدارلامالىق كومپونەنتتەردىڭ ءتيىمدى ۇيلەسىمى ءۇشىن بەرىلەدى. چەمپيوناتقا قاتىسۋ قازاقستان ءۇشىن جەتى جىلدىق ۇزىلىستەن كەيىن ABU Robocon حالىقارالىق ارەناسىنا قايتا ورالۋ بولدى. بيىلعى ۇلتتىق ىرىكتەۋ مەن قۇرامانى دايىنداۋدى USTEM Foundation قوعامدىق قورى ۇيىمداستىردى»، – دەپ اتاپ ءوتتى ۆەدومستۆودا.
ىرىكتەۋ كەزەڭى 1 شىلدەدە Almaty Tech Cup اياسىندا ءوتتى. قورىتىندىسى بويىنشا نازاربايەۆ ۋنيۆەرسيتەتىنىڭ BULAN كومانداسى جەڭىسكە جەتىپ، گونكونگتەگى فينالدا قازاقستاننىڭ اتىنان قاتىسۋ قۇقىعىن الدى.
قۇراماعا ءارتۇرلى ماماندىقتاردىڭ 28 ستۋدەنتى – مەحانيكتەر، ەلەكترونيكتەر، باعدارلاماشىلار، ديزاينەرلەر جانە جوبا مەنەدجەرلەرى ەندى. حالىقارالىق كەزەڭدە ەلدى مەيىرجان تازدارباي، تەمىرلان امانگەلدى، ايمەدەت تاۋفيك، فارشەد يبروحيموۆ جانە داستان مۇسرەپوۆ تانىستىردى.
Mabuchi Motor Award جاپوندىق Mabuchi Motor كومپانياسىنىڭ شاعىن ەلەكتر قوزعالتقىشتارىن وندىرۋگە ماماندانعان كومپانياسىنىڭ سىيلىعى. ول جوبالاۋعا ەرەكشە كوزقاراس تانىتقان، مەحانيكالىق ينجەنەريانىڭ جوعارى دەڭگەيىن كورسەتكەن جانە تەحنولوگيالاردى كەشەندى قولدانعان كوماندالارعا بەرىلەدى.