قازاقستاندا سۋ رەسۋرستارى جانە يرريگاسيا مينيسترلىگى جانىنان سۋ ديپلوماتياسى دەپارتامەنتى قۇرىلدى. ۆەدومستۆونى 34 جاستاعى دانيار ءشارىپ باسقارادى، دەپ حابارلايدى infohub.kz.
مينيسترلىكتىڭ ءباسپاسوز قىزمەتىنىڭ مالىمەتىنشە، جاڭا بولىمشە ەلدىڭ سۋ ديپلوماتياسى سالاسىنداعى جۇيەلى ءارى دايەكتى جۇمىسىن قامتاماسىز ەتۋگە ارنالعان. دەپارتامەنت قازاقستاننىڭ ترانسشەكارالىق سۋ وبەكتىلەرى بويىنشا تۇراقتى جۇمىس ىستەيتىن مەملەكەتارالىق كوميسسيالارعا قاتىسۋىن ۇيلەستىرەدى، ارىپتەس مەملەكەتتەرمەن كەلىسسوز پروسەسىن سۇيەمەلدەيدى، سونداي-اق سۋ سالاسىنداعى مەملەكەتارالىق كەلىسىمدەردى دايىنداۋ مەن ىسكە اسىرۋمەن اينالىسادى.
دانيار ءشارىپ 1992 جىلى الماتى وبلىسىندا دۇنيەگە كەلگەن. ول ءال-فارابي اتىنداعى قازاق ۇلتتىق ۋنيۆەرسيتەتىن «گيدرولوگيا» ماماندىعى بويىنشا جانە كاسپي قوعامدىق ۋنيۆەرسيتەتىن «قۇقىقتانۋ» ماماندىعى بويىنشا بىتىرگەن.
ەڭبەك جولىن 2015 جىلى قازاقستان رەسپۋبليكاسى اۋىل شارۋاشىلىعى مينيسترلىگى سۋ رەسۋرستارى كوميتەتىنىڭ سۋ شارۋاشىلىعى قۇرىلىستارىن پايدالانۋ جانە دامىتۋ باسقارماسىندا ەكسپەرت مىندەتىن اتقارۋشى بولىپ باستاعان. كەيىن ەكسپەرت جانە باس ەكسپەرت بولىپ جۇمىس ىستەگەن.
2019 جىلى اۋىل شارۋاشىلىعى مينيسترلىگى ترانسشەكارالىق وزەندەر دەپارتامەنتىنىڭ ترانسشەكارالىق وزەندەر باسقارماسىنىڭ باس ەكسپەرتى قىزمەتىن اتقارعان. 2019-2023 جىلدارى قازاقستان رەسپۋبليكاسى ەكولوگيا، گەولوگيا جانە تابيعي رەسۋرستار مينيسترلىگى ترانسشەكارالىق وزەندەر دەپارتامەنتىنىڭ ترانسشەكارالىق وزەندەر باسقارماسىنىڭ باس ەكسپەرتى، كەيىن باسقارما باسشىسى بولعان.
2023-2024 جىلدارى قازاقستان رەسپۋبليكاسى ۇكىمەت اپپاراتىنىڭ باس ينسپەكتورى قىزمەتىن اتقارعان. 2024 جىلدان باستاپ قازىرگە دەيىن قازاقستان رەسپۋبليكاسى سۋ رەسۋرستارى جانە يرريگاسيا مينيسترلىگى حالىقارالىق ىنتىماقتاستىق دەپارتامەنتى ديرەكتورىنىڭ ورىنباسارى، كەيىن ديرەكتورى بولىپ جۇمىس ىستەۋدە.