2026 جىلدىڭ 1 قىركۇيەگىنەن باستاپ قازاقستاندا شىنى بوتەلكەدەگى سىرا مەن سىرا سۋسىندارىن مىندەتتى سيفرلىق تاڭبالاۋ ەنگىزىلەدى، دەپ حابارلايدى infohub.kz سايتى.
ق ر قارجى مينيسترلىگى مەملەكەتتىك كىرىستەر كوميتەتىندە اتاپ وتكەندەي، وسى كۇننەن كەيىن وندىرىلگەن نەمەسە اكەلىنگەن ونىمدە Data Matrix تاڭبالاۋ كودى بولۋى ءتيىس.
تاڭبالاۋ كەزەڭ-كەزەڭىمەن ەنگىزىلەدى: 2026 جىلدىڭ 1 اقپانىنان باستاپ — كەگتەگى ونىمگە، 2026 جىلدىڭ 1 قىركۇيەگىنەن باستاپ — شىنى بوتەلكەلەرگە، ال 2027 جىلدىڭ 1 قاڭتارىنان باستاپ — قاڭىلتىر بانكىلەرگە.
«بۇدان ءارى ءونىمنىڭ اينالىمعا قاتىسۋشىلار اراسىندا بەرىلۋى كەزىندە ەلەكتروندىق رەسىمدەۋمەن جانە قۇجاتتاردى راستاۋمەن تولىق قاداعالانۋى قامتاماسىز ەتىلەتىن بولادى»، — دەپ اتاپ ءوتتى ۆەدومستۆودا.
مكك قوسقانداي، سيفرلىق تاڭبالاۋ تاۋاردىڭ وندىرۋشىدەن نەمەسە يمپورتتاۋشىدان بولشەك ساۋداعا دەيىنگى جولىن قاداعالاۋعا مۇمكىندىك بەرەدى، بۇل نارىقتىڭ اشىقتىعىن ارتتىرۋعا ىقپال ەتەدى.
سىرا ونىمدەرىنىڭ اينالىمىنا قاتىسۋشىلار tanba.markirovka.kz پورتالىنداعى سس مپت-عا تىركەلىپ، تاۋار كارتوچكالارىن تىركەۋدى باستاۋى قاجەت. بۇل پروسەدۋرانى الدىن الا اياقتاۋ ۇسىنىلادى، وسىلايشا تاڭبالاۋ كودتارىن الۋعا بولادى.
سونىمەن قاتار، مىندەتتى تاڭبالاۋ ەنگىزىلگەنگە دەيىن وندىرىلگەن تاڭبالانباعان سىرا قالدىقتارىن ءبىر جىل بويى ساتۋعا بولادى.