infohub.kz سايتىنىڭ حابارلاۋىنشا، 2022 جىلدان بەرى ينتەرپول ارقىلى حالىقارالىق ىزدەۋدە جۇرگەن، الاياقتىققا كۇدىكتى قازاقستاندىق تۇركيادا ۇستالىپ، وتانىنا دەپورتاسيالاندى.
30 جاستاعى ەر ادام سولتۇستىك قازاقستان وبلىسى كريمينالدىق پوليسيا باسقارماسى، ق ر ءىىم كريمينالدىق پوليسيا دەپارتامەنتى قىزمەتكەرلەرىنىڭ جانە انتالياداعى قازاقستان باس كونسۋلدىعىنىڭ كومەگىمەن بىرلەسكەن وپەراسيا ناتيجەسىندە ۇستالدى.
«تەرگەۋ نۇسقاسى بويىنشا، 2021 جىلعى تامىز-قىركۇيەك ايلارىندا كۇدىكتى سەرىكتەستەرىمەن بىرگە قازاقستاندىقتاردى 6 ملن تەڭگەدەن استام سوماعا الداعان»، — دەپ حابارلادى سقو پوليسيا دەپارتامەنتى.
16 شىلدەدە ەر ادام تۇركيادان قازاقستانعا دەپورتاسيالاندى، مۇندا ول تەرگەۋ ارەكەتتەرىنە تارتىلادى.
پوليسيادا اتاپ وتكەندەي، 2026 جىلدىڭ باسىنان بەرى سقو پوليسيا قىزمەتكەرلەرى الاياقتىق ءۇشىن ىزدەۋدە جۇرگەن ءتورت ادامدى ۇستاعان. قىلمىستىق ىستەر ماتەريالدارى بويىنشا ولاردىڭ ارەكەتتەرىنەن كەلتىرىلگەن جالپى زالال 568 ملن تەڭگەنى قۇرايدى.
بۇدان بۇرىن تۇركيا قازاقستانعا الاياقتىققا كۇدىكتى «اتىراۋدان شىققان حاكەردى» بەرگەن. بۇل — اتىراۋ وبلىسىندا بۇكىل وتباسىنىڭ قازا تابۋىمەن رەزونانستى وقيعادان كەيىن الەۋمەتتىك جەلىلەردە تانىمال بولعان ەر ادام. ينتەرنەتتە ۇستالعان ادامنىڭ ءوز بەتىنشە «تەرگەۋ» جۇرگىزەتىنىن ايتقان ۆيدەوسى تارالعان.