قازاقستانداعى تۇرمىستىق قىزمەت نارىعىنا جاسالعان تالداۋ 15 ساناتتىڭ 8-ىندە قىزمەت كولەمىنىڭ كۇرت تومەندەگەنىن كورسەتتى. رەسمي ستاتيستيكا شاشتارازدار، سۇلۋلىق سالوندارى، گرۋمينگ جانە باسقا قىزمەتتەرگە سۇرانىستىڭ ازايعانىن تىركەيدى، الايدا ساراپشىلار مۇنى بيزنەستىڭ كولەڭكەگە كەتۋىمەن بايلانىستىرادى، دەپ حابارلايدى infohub.kz سايتى.
2025 جىلدىڭ قورىتىندىسى بويىنشا ەرلەر جانە بالالار شاشتارازدارىنىڭ قىزمەت كولەمى نەبارى 6،3 ملرد تەڭگەنى قۇرادى، بۇل 2024 جىلعى كورسەتكىشتەن 5،5 ەسە از. مۇنداي ەلەۋلى قۇلدىراۋدى تەك تۇتىنۋشىلىق ادەتتەردىڭ وزگەرۋىمەن ءتۇسىندىرۋ قيىن.
باسقا سەگمەنتتەردە دە وسىنداي جاعداي: نەكە اگەنتتىكتەرىنىڭ قىزمەت كولەمى 195 ەسە، اقىلى دارەتحانالاردىكى — ەكى ەسە، سۇلۋلىق سالوندارىنىكى — 42،9%-عا، گرۋمينگ-سالونداردىكى — 49 ەسە (4،1 ملرد تەڭگەدەن 83 ملن تەڭگەگە دەيىن) قىسقارعان.
كوسمەتولوگيالىق قىزمەتتەر، مانيكيۋر جانە پەديكيۋردىڭ كوپجىلدىق ديناميكاسى دا كۇمان تۋدىرادى: 2025 جىلى بۇل قىزمەتتەردىڭ كولەمى 2022 جىلعى دەڭگەيدەن ءۇش ەسە تومەن، الايدا قازاقستاندىقتار ولاردى تۇتىنۋدان كۇرت باس تارتتى دەپ ايتۋ ەكىتالاي.
ساراپشىلاردىڭ پىكىرىنشە، كاسىپكەرلەردىڭ ءبىر بولىگى كولەڭكەلى سەكتورعا كەتكەن. بۇعان 2025 جىلى جەكە كاسىپكەرلەرگە سالىق جۇكتەمەسىنىڭ ارتۋى دالەل: الەۋمەتتىك اۋدارىمدار مولشەرلەمەسى 3،5%-دان 5%-عا، مىندەتتى زەينەتاقى جارنالارى 1،5%-دان 2،5%-عا ءوستى، بۇل مىندەتتى تولەمدەردىڭ ەڭ تومەنگى مولشەرىنىڭ وسۋىنە اكەلدى.