قازاقستان كولىك مينيسترلىگى جولاۋشىلاردى، باگاجدى جانە جۇكتەردى اۋە كولىگىمەن تاسىمالداۋ ەرەجەلەرىنە وزگەرىستەر ەنگىزۋ جوباسىن قوعامدىق تالقىلاۋعا ۇسىندى. جاڭا ەرەجەلەر قىزمەت كورسەتۋدى جەتىلدىرۋگە جانە جولاۋشىلار قۇقىعىن قورعاۋدى كۇشەيتۋگە باعىتتالعان، دەپ حابارلايدى infohub.kz.
ۇسىنىستاردىڭ ءبىرى مۋزىكالىق اسپاپتاردى تاسىمالداۋعا قاتىستى. ولاردى ۇشاق سالونىندا قول جۇگى رەتىندە، جەكە جولاۋشى ورنىندا نەمەسە تىركەلگەن باگاج رەتىندە بەلگىلەنگەن تالاپتاردى ساقتاي وتىرىپ تاسىمالداۋعا رۇقسات بەرۋ جوسپارلانۋدا. اتاپ ايتقاندا، دومبىرا مەن قوبىز سياقتى اسپاپتاردى سالوندا بەرىك قورعانىش قابىندا تاسىمالداۋ مۇمكىندىگىن بەكىتۋ ۇسىنىلادى. بۇل رەتتە اسپاپتاردىڭ ولشەمدەرى 110×35×30 سم-دەن، سالماعى 10 كگ-نان اسپاۋى ءتيىس.
تاعى ءبىر وزگەرىس جانۋارلاردى تاسىمالداۋعا قاتىستى: قۇجات بويىنشا، ولاردى اۋەكومپانيالار بەلگىلەگەن شارتتارمەن ۇشاق سالونىندا تاسىمالداۋعا بولادى. سونىمەن قاتار، مۇگەدەكتىگى بار جولاۋشىلارعا اۋە تاسىمالى بويىنشا جەڭىلدىكتەردى زاڭ جۇزىندە بەكىتۋ ۇسىنىلادى.
ەگەر ۇشاقتىڭ ورنىنا سىيىمدىلىعى از اۋە كەمەسى قويىلسا، وتىرعىزۋ كەزىندە كامەلەتكە تولماعاندارعا، مۇگەدەكتىگى بار ادامدارعا، اۋىر ناۋقاستارعا، جۇكتى ايەلدەر مەن زەينەتكەرلەرگە باسىمدىق بەرۋ جوسپارلانۋدا.
جولاۋشىلار قۇقىعىن قورعاۋدى كۇشەيتۋ ماقساتىندا جوبا جولاۋشىنى جەتكىزۋ كەشىكتىرىلگەنى ءۇشىن ايىپپۇلدى تولەۋدىڭ ناقتى مەرزىمىن — ءتيىستى ءوتىنىش بەرىلگەن كۇننەن باستاپ 10 كۇنتىزبەلىك كۇننەن اسىرماۋدى بەلگىلەۋدى ۇسىنادى. سونداي-اق، تاسىمالداۋشىنىڭ كىناسى دالەلدەنگەن جاعدايدا، تىركەلمەگەن باگاجدىڭ زاقىمدالۋى ءۇشىن اۋەكومپانيالاردىڭ جاۋاپكەرشىلىگىن قاراستىرۋ جوسپارلانۋدا.
نورماتيۆتىك قۇقىقتىق اكتىنىڭ جوباسى «اشىق نقا» پورتالىندا جاريالانعان، وندا بارلىق نيەت بىلدىرۋشىلەر قۇجاتپەن تانىسىپ، ءوز ۇسىنىستارى مەن ەسكەرتۋلەرىن قالدىرا الادى.