قازاقستان، ۋكراينا جانە چەحيا پوليسياسى ينتەرنەت-الاياقتاردىڭ ەكى ترانسۇلتتىق قىلمىستىق توبىن جويدى، دەپ حابارلايدى infohub.kz.
ق ر ءىىم دەپارتامەنت باستىعى – رەسمي وكىلى شىڭعىس الەكاشەۆتىڭ ايتۋىنشا، كيبەرقىلمىسقا قارسى كۇرەس اياسىندا ءىىم قىزمەتكەرلەرى ينتەرنەت-الاياقتىققا شەتەل ازاماتتارىنىڭ قاتىسى بار ەكەنىن انىقتاعان. قىزمەتتىك ءىسساپار بارىسىندا ۋكراينا ۇلتتىق پوليسياسى جانە چەحيا پوليسياسىمەن بىرلەسىپ، ەكى ترانسۇلتتىق قىلمىستىق توپتىڭ ارەكەتىنە جول بەرىلمەدى.
زاپوروجە قالاسىندا الاياقتاردىڭ ەكى كولل-ورتالىعى جويىلدى. قىلمىسكەرلەر وزدەرىن بانك قىزمەتكەرلەرى مەن قۇقىق قورعاۋ ورگاندارىنىڭ وكىلى رەتىندە تانىستىرىپ، قازاقستاندىقتارعا قوڭىراۋ شالىپ، ولاردىڭ شوتتارىنىڭ دەرەكتەرىن الداپ العان. 9 ادام ۇستالدى. ءتىنتۋ كەزىندە 17 كومپيۋتەر، 62 ۇيالى تەلەفون، سونداي-اق 35 گرامم «مەتادون» پرەپاراتى تاركىلەندى.
ودەسسا قالاسىندا الاياقتاردىڭ ءۇش كولل-ورتالىعى جويىلدى. ولار ءىرى ينۆەستيسيالىق جالعان كومپانيالارعا اقشا سالۋ سىلتاۋىمەن ينتەرنەت-الاياقتىقپەن اينالىسقان. مۇندا 23 ادام ۇستالىپ، ونىڭ 9-ى ۋاقىتشا ۇستاۋ يزولياتورىنا قامالدى. 8 اۆتوكولىك، 58 نوۋتبۋك، 52 سمارتفون، 100-دەن استام سيم-كارتا، سونداي-اق 200 مىڭ اقش دوللارىنان استام سوماداعى سيفرلىق اكتيۆتەر تاركىلەندى.
«قازىرگى ۋاقىتتا تەرگەۋ جانە جەدەل-ىزدەستىرۋ ءىس-شارالارى جالعاسۋدا»، — دەدى شىڭعىس الەكاشيەۆ.