قازاقستان — وزبەكستان — اۋعانستان — پاكىستان (CASA) تەمىرجول باعىتىن پاكىستاننىڭ تەڭىز پورتتارىنا شىعا وتىرىپ بىرلەسىپ پىسىقتاۋ تۋرالى مەموراندۋمعا ءۇش ەلدىڭ بەيىندى مينيسترلىكتەرى قول قويدى، دەپ حابارلايدى infohub.kz سايتى.
قازاقستان ۇكىمەتىنىڭ ءباسپاسوز قىزمەتى ءمالىم ەتكەندەي، كەلىسىمگە قازاقستان مەن وزبەكستاننىڭ كولىك مينيسترلىكتەرى، سونداي-اق بىرىككەن اراب امىرلىكتەرىنىڭ ەنەرگەتيكا جانە ينفراقۇرىلىم مينيسترلىگى قاتىستى.
جوبا ورتالىق جانە وڭتۇستىك ازيا اراسىندا جاڭا تەمىرجول باعىتىن قالىپتاستىرۋدى كوزدەيدى. ول حالىقارالىق تاسىمال، ساۋدا، لوگيستيكا جانە ينۆەستيسيالىق ىنتىماقتاستىق مۇمكىندىكتەرىن كەڭەيتۋگە باعىتتالعان.
مەموراندۋم اياسىندا تاراپتار تەحنيكالىق جانە ەكونوميكالىق زەرتتەۋلەر جۇرگىزىپ، تالدامالىق باعالاۋلار دايىنداۋدى جانە قاجەتتى تەمىرجول ينفراقۇرىلىمى مەن وعان بايلانىستى نىسانداردى دامىتۋدىڭ ورىندىلىعىن زەردەلەۋدى جوسپارلاپ وتىر.
ۇكىمەتتە اتاپ وتكەندەي، قازاقستان مەن وزبەكستان دامىعان تەمىرجول ينفراقۇرىلىمىنا جانە ايتارلىقتاي ترانزيتتىك الەۋەتكە يە. بىرىككەن اراب امىرلىكتەرى بولسا كولىك ينفراقۇرىلىمى، لوگيستيكا جانە ءىرى ينۆەستيسيالىق جوبالاردى جۇزەگە اسىرۋ سالاسىندا حالىقارالىق تاجىريبەگە يە. تاراپتار بۇل مۇمكىندىكتەردى CASA-نى پراكتيكالىق پىسىقتاۋعا جانە ونى ىسكە اسىرۋ تەتىكتەرىن ايقىنداۋعا پايدالانباق.
قاتىسۋشىلار سونداي-اق الداعى قادامدار مەن بىرلەسكەن جۇمىستىڭ باعىتتارىن تالقىلادى. اتاپ ايتقاندا، جوبانىڭ تەحنيكالىق، ەكونوميكالىق جانە قارجىلىق ماسەلەلەرىن كەشەندى پىسىقتاۋ ءۇشىن جۇمىس توبىن قۇرۋ قاراستىرىلۋدا.
بۇعان دەيىن «كۋرسيۆ» 2026 جىلدىڭ ماۋسىمىندا ۆيسە-پرەمەر سەرىك جۇمانعارين كابۋلداعى كەلىسسوزدەردە CASA ءدالىزىن دامىتۋدى قولداعانىن جازعان ەدى. ول پاكىستاننىڭ كاراچي جانە گۆادار پورتتارى باعىتىندا 10 ملن تونناعا دەيىن جۇك تاسىمالداۋدى قامتاماسىز ەتە الادى.