قازاقستان پرەزيدەنتى قاسىم-جومارت توقاەۆتىڭ باستاماسىمەن حالىقارالىق ەرىكتىلەر جىلى اياسىندا نيۋ-يوركتەگى بۇۇ شتاب-پاتەرىندە ۆولونتەرلىك سالاسىنداعى حالىقارالىق ىنتىماقتاستىقتى دامىتۋعا ارنالعان ءبىرقاتار ءىس-شارا ءوتتى، دەپ حابارلايدى infohub.kz سايتى.
باستامانى قازاقستان كوتەردى. ونى ازەربايجاننىڭ ءوزارا ءىس-قيمىل جانە سەنىم شارالارى كەڭەسىندەگى (وسك) ءتوراعالىعى، وسك حاتشىلىعى جانە بۇۇ ەرىكتىلەر باعدارلاماسى قولدادى.
باعدارلاما اياسىندا «وسك-گە مۇشە مەملەكەتتەردەگى ۆولونتەرلىك» اتتى فوتوۆىستاۆكا اشىلدى جانە «وسك-گە مۇشە مەملەكەتتەردەگى ۆولونتەرلىكتىڭ ۇزدىك تاجىريبەلەرى» تاقىرىبىندا حالىقارالىق پانەلدىك پىكىرتالاس ءوتتى. قاتىسۋشىلارعا وسك ەلدەرىندەگى ەرىكتىلىكتى دامىتۋدىڭ وزىق تاجىريبەسى تۋرالى ەلەكتروندى باسىلىم دا تانىستىرىلدى.
پىكىرتالاستا قازاقستاننىڭ تاجىريبەسىنە ەرەكشە نازار اۋدارىلدى. بۇۇ وكىلدەرى ەرىكتىلىك قىزمەتىن ەسەپكە الۋدىڭ ۇلتتىق جۇيەسىن جانە ەل ىشىندە دە، حالىقارالىق دەڭگەيدە دە ۆولونتەرلىكتى ىلگەرىلەتۋ جونىندەگى تۇراقتى مەملەكەتتىك ساياساتتى جوعارى باعالادى.
تالقىلاۋعا بۇۇ، وسك-گە مۇشە مەملەكەتتەردىڭ وكىلدەرى مەن حالىقارالىق ساراپشىلار قاتىستى. ولار ۆولونتەرلىك، جاستاردىڭ قاتىسۋى جانە حالىقارالىق ىنتىماقتاستىق سالاسىنداعى تابىستى تاجىريبەلەرمەن ءبولىستى.
ءىس-شارالاردىڭ بۇۇ شتاب-پاتەرىندە ءوتۋى قازاقستاننىڭ جاھاندىق ەرىكتىلىك كۇن ءتارتىبىن ىلگەرىلەتۋگە جانە تۇراقتى دامۋ مۇددەسىندەگى ىنتىماقتاستىقتى نىعايتۋعا قوسقان ۇلەسىنىڭ مويىندالعانىن راستادى.