اۋا رايىنىڭ تۇراقسىزدىعى قازاقستاننىڭ باسىم بولىگىندە ساقتالادى، دەپ حابارلايدى infohub.kz Kazinform اگەنتتىگىنە سىلتەمە جاساپ.
«كازگيدرومەت» رمك ءباسپاسوز حاتشىسى الينا يسماگۋلوۆا ورتالىق كوممۋنيكاسيالار قىزمەتىندە وتكەن بريفينگتە 29 ساۋىردە نايزاعاي ويناپ، جاڭبىر جاۋاتىنىن، ال وڭتۇستىك-شىعىس تاۋلى ايماقتارىندا جاڭبىر مەن قار جاۋاتىنىن مالىمدەدى.
«تەك وڭتۇستىك-باتىس، سولتۇستىك-باتىس جانە ورتالىق ايماقتاردا انتيسيكلون تارماعىنىڭ اسەرىنەن جاۋىن-شاشىنسىز اۋا رايى بولادى. رەسپۋبليكا بويىنشا جەل كۇشەيەدى، باتىس پەن سولتۇستىكتە بۇرشاق، وڭتۇستىك-باتىس پەن وڭتۇستىكتە داۋىل مەن شاڭدى داۋىل، وڭتۇستىك-شىعىستا تۇمان كۇتىلەدى»، — دەپ يسماگۋلوۆانىڭ ءسوزىن كەلتىرەدى Kazinform اگەنتتىگىنىڭ ءتىلشىسى.
الينا يسماگۋلوۆا تاعى دا تۇندە شىعىستا، جامبىل وبلىسىنىڭ تاۋلى ايماقتارىندا اۋا تەمپەراتۋراسى -2 گرادۋسقا دەيىن تومەندەپ، اياز بولاتىنىن ايتتى.
ماڭعىستاۋ وبلىسىنىڭ باسىم بولىگىندە، قىزىلوردا وبلىسىنىڭ ورتالىعى مەن وڭتۇستىگىندە، تۇركىستان وبلىسىنىڭ سولتۇستىگىندە، اتىراۋ وبلىسىنىڭ وڭتۇستىگىندە، جەتىسۋ وبلىسىنىڭ سولتۇستىگىندە، اباي وبلىسىنىڭ وڭتۇستىگىندە جانە قاراعاندى وبلىسىنىڭ وڭتۇستىگىندە ءورت ءقاۋپى جوعارى دەڭگەيدە ساقتالۋدا.