تاجىكستان استاناسىندا «قازاقستان مەديسيناسى كۇندەرى» اياسىندا اكادەميك باتپەنوۆ اتىنداعى ۇلتتىق تراۆماتولوگيا جانە ورتوپەديا عىلىمي ورتالىعىنىڭ جەتەكشى تراۆماتولوگ-ورتوپەدتەرى «يستيكلول» كەشەنىندە كۇردەلى حيرۋرگيالىق وتالار جاسادى، دەپ حابارلايدى infohub.kz سايتى.
كۇننىڭ ەڭ كۇردەلى وتالارىنىڭ ءبىرى – 13 جاسار جاسوسپىرىمگە IV دارەجەلى سكوليوزدى تۇزەتۋ بولدى. ونى تاجىك ارىپتەستەرىمەن بىرلەسىپ، ۇتوعو ومىرتقا پاتولوگياسى ورتالىعىنىڭ ديرەكتورى سەيدالى ابدالييەۆ پەن ومىرتقا جاراقاتى بولىمشەسىنىڭ مەڭگەرۋشىسى مۇرات بايداربەكوۆ جاسادى.
تاعى ءبىر كۇردەلى وتا جول-كولىك وقيعاسىنان زارداپ شەككەن 37 جاستاعى ەر ادامعا جاسالدى. وعان اۋىر ارالاس جاراقات دياگنوزى قويىلدى: جامباس سۇيەكتەرىنىڭ زاقىمدانۋى، سول جاق سان سۇيەگى باسىنىڭ ورتالىق شىعۋى، وڭ جىلىنشىكتىڭ سىنۋى جانە وڭ اياق تابانىنىڭ تاران سۇيەگىنىڭ شىعۋى.
«ومىرلىك كورسەتكىشتەر بويىنشا تاران سۇيەگىنىڭ شىعۋىن قالپىنا كەلتىرۋ جانە وڭ جىلىنشىكتىڭ وستەوسينتەزى جاسالدى. وتانى قايرات تاجين ارىپتەستەرىمەن بىرگە جاسادى»، – دەلىنگەن حابارلامادا.
وتالاردان بولەك، قازاقستاندىق حيرۋرگتار جەرگىلىكتى پاسيەنتتەردى ومىرتقا اۋرۋلارى مەن جاراقات سالدارىنان، سونداي-اق ورتوپەديالىق پاتولوگياسى بار ادامداردى قابىلدادى. ءبىر كۇندە دارىگەرلەر ستاسيوناردا 23 پاسيەنتتى قاراپ، 67 ادامعا كەڭەس بەردى.
بۇعان دەيىن تاجىكستانعا كارديولوگيا، ونكولوگيا، اكۋشەرلىك-گينەكولوگيا، پەدياتريا جانە تراۆماتولوگيا سالالارىنداعى رەسپۋبليكالىق ورتالىقتاردىڭ قازاقستاندىق دارىگەرلەرى كەلگەنى حابارلانعان بولاتىن. دۋشانبەدەگى قازاقستان مەديسيناسى كۇندەرى اياسىندا وتاندىق ماماندار بىرلەسكەن وتالار مەن شەبەرلىك ساباقتارىن وتكىزەدى.