قازاقستاندىق ونكوۋرولوگتار تاجىك ارىپتەستەرىمەن جوعارى تەحنولوگيالىق لاپاروسكوپيالىق وپەراسيالاردى جاساۋ تاجىريبەسىمەن ءبولىستى. دۋشانبەدەگى رەسپۋبليكالىق ونكوورتالىعىندا ءبىرقاتار شەبەرلىك ساباقتارى مەن وپەراسيالار ءوتتى، دەپ حابارلايدى infohub.kz سايتى.
قازاق ونكولوگيا جانە راديولوگيا عىلىمي-زەرتتەۋ ينستيتۋتىنىڭ (قازعزيوير) حابارلاۋىنشا، ونكوۋرولوگيا ورتالىعىنىڭ جەتەكشىسى حۋسان ۇمىرزاقوۆ تاجىك ماماندارىنا پراكتيكالىق شەبەرلىك ساباعىن وتكىزدى. ول دارىسىندە ونكوۋرولوگياداعى زاماناۋي از ءينۆازيۆتى ادىستەر تۋرالى ايتىپ، ينستيتۋتتىڭ لاپاروسكوپيالىق تەحنولوگيالاردى قولدانۋ تاجىريبەسىن تانىستىردى.
شەبەرلىك ساباعىنىڭ ماڭىزدى بولىگى وپەراسيا بولمەسىندەگى جۇمىس بولدى. تاجىك ارىپتەستەرىمەن بىرگە بۇيرەك، بۇيرەك ءۇستى بەزى جانە قۋىققا لاپاروسكوپيالىق وپەراسيالار جاسالدى. سونىمەن قاتار، ءىس-شارا اياسىندا كۇردەلى جاعدايداعى پاسيەنتتەرگە كونسۋلتاسيالار وتكىزىلدى.
مامانداردىڭ ايتۋىنشا، مۇنداي فورماتتاعى شەبەرلىك ساباعى دۋشانبەدەگى ارىپتەستەرگە قاتتى ۇنادى، ويتكەنى ول زاماناۋي حيرۋرگيالىق ادىستەر مەن تاسىلدەردى تالقىلاۋعا عانا ەمەس، ولاردىڭ پراكتيكادا قولدانىلۋىن كورۋگە مۇمكىندىك بەردى.
قازاقستان دەنساۋلىق ساقتاۋ مينيسترلىگىنىڭ مالىمەتىنشە، وپەراسيادان كەيىن بارلىق پاسيەنتتەردىڭ جاعدايى قاناعاتتانارلىق، ولار جەرگىلىكتى دارىگەرلەردىڭ باقىلاۋىندا.
بۇعان دەيىن قازاقستاندىق حيرۋرگتار دۋشانبەدە IV دارەجەلى سكوليوزبەن اۋىراتىن 13 جاسار بالاعا جانە جول اپاتىنان اۋىر جاراقات العان 37 جاستاعى ەر ادامعا وپەراسيا جاساعانى حابارلانعان بولاتىن. سونداي-اق، تاجىريبە الماسۋ اياسىندا وتاندىق ماماندار كۇردەلى دياگنوزى بار پاسيەنتتەرگە 70-كە جۋىق كونسۋلتاسيا وتكىزگەن.