قازاقستاندا انومالدى ىستىق ومىرگە نەمەسە دەنساۋلىققا ءقاۋىپ توندىرسە، جۇمىستان باس تارتۋعا زاڭدى نەگىز بولا الادى. الايدا بۇل جاعدايدا دا جۇمىس بەرۋشىنى الدىن الا حاباردار ەتۋ قاجەت. بۇل تۋرالى infohub.kz سايتى ەڭبەك جانە حالىقتى الەۋمەتتىك قورعاۋ مينيسترلىگىنە سىلتەمە جاساپ حابارلايدى.
قازاقستاننىڭ ەڭبەك زاڭناماسى انومالدى اۋا رايىنا بايلانىستى جۇمىس كۇنىن قىسقارتۋدى، قوسىمشا دەمالىس كۇندەرىن ەنگىزۋدى نەمەسە قاشىقتان جۇمىسقا كوشۋدى اۆتوماتتى تۇردە قاراستىرمايدى. دەگەنمەن، قولايسىز كليماتتىق جاعدايلاردا جۇمىس بەرۋشى جۇمىسشىمەن كەلىسە وتىرىپ، جۇمىس رەجيمىن نەمەسە فورماتىن وزگەرتۋگە قۇقىلى.
جۇمىسشىلار دا باسشىلىققا كەستەنى وزگەرتۋ، يكەمدى جۇمىس ۋاقىتىن بەلگىلەۋ نەمەسە ۋاقىتشا قاشىقتان جۇمىس ىستەۋ تۋرالى ۇسىنىسپەن جۇگىنە الادى. «تۇپكىلىكتى شەشىمدى جۇمىس بەرۋشى وندىرىستىك قاجەتتىلىك پەن ەڭبەك زاڭناماسىنىڭ تالاپتارىن ەسكەرە وتىرىپ قابىلدايدى»، — دەپ ناقتىلادى مينيسترلىكتە.
سونىمەن قاتار، ەگەر ەڭبەك جاعدايلارى ناقتى ءقاۋىپ توندىرسە، جۇمىستان باس تارتۋ ەڭبەك ءتارتىبىن بۇزۋ رەتىندە قاراستىرىلمايدى.
ەڭبەك مينيسترلىگىندە سونداي-اق ەڭبەك كودەكسىندە جۇمىس بەرۋشى جۇمىس ۋاقىتىن قىسقارتۋعا نەمەسە پروسەستى توقتاتۋعا مىندەتتى بولاتىن ناقتى تەمپەراتۋرالىق ماندەر كورسەتىلمەگەنىن اتاپ ءوتتى. الايدا اشىق اۋادا نەمەسە جىلىتىلمايتىن ءۇي-جايدا جۇمىس ورىندالعان كەزدە جۇمىس بەرۋشى قىزمەتكەرلەردى جوعارى نەمەسە تومەن تەمپەراتۋرادان قورعاۋ شارالارىن قابىلداۋعا مىندەتتى.
«ونىڭ ىشىندە جىلىنۋ نەمەسە سالقىنداۋ ءۇشىن تەحنولوگيالىق ۇزىلىستەر ۇيىمداستىرۋ، قىزمەتكەرلەردى ءتيىستى جەكە قورعانىس قۇرالدارىمەن قامتاماسىز ەتۋ، ال قىزمەتكەرلەردىڭ ومىرىنە نەمەسە دەنساۋلىعىنا ءقاۋىپ تونگەن جاعدايدا — ءقاۋىپ جويىلعانعا دەيىن جۇمىستى توقتاتا تۇرۋ»، — دەپ قوستى ۆەدومستۆودا.
ەگەر جۇمىس بەرۋشىگە دە، جۇمىسشىعا دا بايلانىستى ەمەس جاعدايلارعا بايلانىستى جۇمىستى ورىنداۋ مۇمكىن بولماسا، ءماجبۇرلى ءۇزىلىس ۋاقىتى بوس تۇرۋ رەتىندە تولەنەدى. ونىڭ مولشەرى ەڭبەك نەمەسە ۇجىمدىق شارتتاردا بەلگىلەنەدى، ءبىراق ەڭ تومەنگى جالاقىدان (ەتج) — 85 مىڭ تەڭگەدەن تومەن بولماۋى كەرەك.