جىل باسىنان بەرى «قازاقتەلەكوم» اقتاۋداعى سەگىز تۇرعىن ءۇيدى ءوزىنىڭ وپتيكالىق ينفراقۇرىلىمىنا قوسىپ ۇلگەردى، ال جاقىن ارادا تاعى ءتورت تۇرعىن كەشەنى GPON تەحنولوگياسىنا قول جەتكىزەدى. جاڭادان قوسىلعان نىسانداردىڭ ءبىرى — 240 پاتەرگە ارنالعان «ايسار» تۇرعىن كەشەنى، دەپ حابارلايدى infohub.kz سايتى.
«ايسار» تۇرعىن كەشەنىندە تۇراتىن زۋلپيا اراحوۆانىڭ وتباسى ءۇشىن ءۇيدىڭ وپتيكاعا قوسىلۋى وقۋ جىلىنىڭ باستالۋىمەن تۇسپا-تۇس كەلدى. وتباسىندا ينتەرنەتتى بەلسەندى تۇردە بالالار پايدالانادى — وقۋ، اقپارات ىزدەۋ جانە ونلاين ساباقتار ءۇشىن.
«ءقازىر وقۋ جىلى باستالعاندىقتان، ينتەرنەت بالالارعا وتە قاجەت. ولار ءۇي تاپسىرماسىن دايىندايدى، قوسىمشا اقپارات تابادى، ونلاين ساباقتارعا قاتىسادى. سوندىقتان ءبىزدىڭ وتباسى ءۇشىن ينتەرنەتتىڭ جىلدام ءارى تۇراقتى بولۋى ماڭىزدى. ەندى مۇنداي قىزمەتتەردىڭ ءبىزدىڭ ۇيدە دە قولجەتىمدى بولعانى وتە ىڭعايلى»، — دەدى زۋلپيا اراحوۆا.
GPON تەحنولوگياسى وپتوۆولوكوندى جەلىنى ابونەنتتىڭ پاتەرىنە تىكەلەي تارتۋدى كوزدەيدى. بۇل ءبىر جەلى ارقىلى بىرنەشە قىزمەتتى ءبىر ۋاقىتتا پايدالانۋعا مۇمكىندىك بەرەدى — ءۇي ينتەرنەتى، تەلەديدار جانە باسقا دا سيفرلىق سەرۆيستەر.
جاڭا تۇرعىن كەشەندەردەن بولەك، «قازاقتەلەكوم» جەكە سەكتوردا دا وپتيكالىق جەلىنى كەڭەيتۋدى جوسپارلاپ وتىر. كەلەسى جوبالاردىڭ ءبىرى مۇنايلى اۋدانىنداعى قىزىلتوبە اۋىلىندا جۇزەگە اسىرىلادى، وندا شامامەن 1200 ۇيگە GPON-عا قوسىلۋ مۇمكىندىگىن قامتاماسىز ەتۋ جوسپارلانۋدا. جوبا شامامەن 800 پورت سالۋدى كوزدەيدى.
«ءبىز وپتيكالىق جەلىنى اقتاۋدىڭ وزىندە دە، ماڭايداعى ەلدى مەكەندەردە دە دامىتۋدى جالعاستىرىپ جاتىرمىز. ءقازىر قالادا تاعى 4 تۇرعىن كەشەنىن قوسۋعا دايىنداپ جاتىرمىز. كەلەسى ۇلكەن جۇمىس كولەمى قىزىلتوبەدە — وندا جەكە سەكتور تۋرالى ءسوز بولىپ وتىر. ءبىز ءۇشىن زاماناۋي ينفراقۇرىلىم تەك جاڭا كوپقاباتتى ۇيلەردە عانا ەمەس، سونىمەن قاتار ساپالى سىمدى ينتەرنەتكە مۇقتاج جەكە ءۇي تۇرعىندارى تۇراتىن جەرلەردە دە پايدا بولۋى ماڭىزدى»، — دەدى «قازاقتەلەكومنىڭ» بولشەك بيزنەس ديۆيزيونىنىڭ ينستاللياسيالىق جۇمىستار دەپارتامەنتى اقتاۋ قالاسى سەحىنىڭ باستىعى باۋىرجان كالييەۆ.
جاڭا نىسانداردى قوسۋ الدىندا كومپانيا ماماندارى تۇرعىندارمەن كەزدەسىپ، قولجەتىمدى قىزمەتتەر بويىنشا كەڭەس بەرەدى جانە وتىنىمدەر جينايدى. مۇنداي فورمات جەلىنى دامىتۋ كەزەڭىندە سۇرانىستى باعالاۋعا جانە قوسىلۋ قاجەتتىلىگىن انىقتاۋعا مۇمكىندىك بەرەدى.