باتىس قازاقستان وبلىسىنداعى «سىرىم» ۆەتەرينارلىق باقىلاۋ بەكەتىندە جالپى سالماعى 107 توننا ءونىمدى زاڭسىز اكەلۋگە جاسالعان ەكى ارەكەتتىڭ جولى كەسىلدى. جۇك چەشەن رەسپۋبليكاسى مەن بەلارۋس رەسپۋبليكاسىنان كەلگەن، دەپ حابارلايدى infohub.kz سايتى.
اۋىل شارۋاشىلىعى مينيسترلىگىنىڭ مالىمەتىنشە، العاشقى بۇزۋشىلىق چەشەن رەسپۋبليكاسىنان تۇركىستان وبلىسى مەن شىمكەنت قالاسىنا باعىتتالعان 88 توننا بيداي كەبەگىنە قاتىستى بولدى. «تەكسەرۋ بارىسىندا ۆەتەرينارلىق ىلەسپە قۇجاتتار مەن تاڭبالاۋدىڭ جوقتىعى، سونداي-اق ءونىمنىڭ قاجەتتى تەرميالىق وڭدەۋدەن وتپەگەنى انىقتالدى»، — دەپ ناقتىلادى ۆەدومستۆو.
ەكىنشى جاعداي — بەلارۋس رەسپۋبليكاسىنىڭ مينسك وبلىسىنان تاشكەنتكە بارا جاتقان 19 توننا سۇيەكسىز سيىر ەتى مەن ەت جارتىلاي فابريكاتتارىنىڭ ءترانزيتى توقتاتىلدى.
مينيسترلىك ەسكە سالعانداي، قولايسىز ەپيزووتيالىق جاعدايعا بايلانىستى 2026 جىلعى 24 اقپاننان باستاپ رەسەي فەدەراسياسىنىڭ جەكەلەگەن وبلىستارى ارقىلى ءتيىستى ءونىمدى اكەلۋگە جانە ترانزيتتەۋگە ۋاقىتشا شەكتەۋلەر قولدانىلىپ كەلەدى.
«سالماعى 107 توننا بولاتىن بارلىق ءونىم جونەلتۋ پۋنكتتەرىنە قايتارىلدى. تاسىمالداۋشىلارعا قاتىستى ق ر اقبتك-نىڭ 406-بابى بويىنشا اكىمشىلىك حاتتامالار تولتىرىلىپ، ايىپپۇل سالىندى. سونداي-اق ەاەو-نىڭ ۆەتەرينارلىق-سانيتارلىق تالاپتارىن ساقتاۋ جونىندە ءتۇسىندىرۋ جۇمىستارى جۇرگىزىلدى»، — دەپ قوستى ۆەدومستۆو.
ايتا كەتەيىك، جىل باسىنان بەرى «سىرىم» بەكەتىندە 230 بۇزۋشىلىق انىقتالىپ، 230 اۆتوكولىك قايتارىلدى، جالپى سوماسى 8،9 ملن تەڭگە ايىپپۇلعا 100 اكىمشىلىك حاتتاما تولتىرىلدى.