قازاقستاننىڭ ادىلەت مينيسترلىگى وتاندىق تەلەارنالار مەن راديوستانسيالاردىڭ وكىلدەرىنە قۇقىقتاردى ۇجىمدىق باسقارۋ سالاسىنداعى ءبىرىڭعاي سيفرلىق پلاتفورمانى (بسپ) تانىستىردى. ۆەدومستۆو جۇيەنىڭ نەگىزگى مۇمكىندىكتەرىن اۆتورلىق جانە ساباقتاس قۇقىقتارعا ارنالعان دوڭگەلەك ۇستەل بارىسىندا كورسەتتى، دەپ حابارلايدى infohub.kz سايتى.
كەزدەسۋ اياسىندا قاتىسۋشىلار قازاقستاندىق زاڭنامانىڭ نەگىزگى نورمالارىن، سونداي-اق ولاردى قولدانۋدىڭ پراكتيكالىق ماسەلەلەرىن ەگجەي-تەگجەيلى تالقىلادى. دوڭگەلەك ۇستەل قورىتىندىسى بويىنشا تاراپتار قولدانىستاعى نورمالاردى قالاي ورىنداۋ كەرەكتىگى جانە وسى سالاداعى قۇقىقتىق رەتتەۋدى قاي باعىتتا ودان ءارى دامىتۋ قاجەتتىگى تۋرالى پىكىر الماستى.
اۆتورلىق قۇقىقتاردى قورعاۋ جونىندەگى باستى ۇيىمداردىڭ ءبىرى — بۇۇ-نىڭ بولىمشەسى رەتىندە اۆتورلىق قۇقىقتاردى ساقتاۋ ساياساتىن جۇرگىزەتىن ددۇ — دۇنيەجۇزىلىك زياتكەرلىك مەنشىك ۇيىمى.
ءوز وكىلەتتىگى شەگىندە بۇل ۆەدومستۆو ءارتۇرلى ەلدەردى زياتكەرلىك مەنشىكتى قورعاۋ جونىندەگى حالىقارالىق كونۆەنسيالارعا، اتاپ ايتقاندا، اۆتورلىق قۇقىق سالاسىنداعى كونۆەنسيالارعا قوسىلۋعا شاقىرادى. قازاقستان وسىنداي بارلىق كونۆەنسيالارعا قوسىلدى، بۇل ءبىزدىڭ «اۆتورلىق قۇقىق جانە ساباقتاس قۇقىقتار تۋرالى» زاڭىمىزدىڭ اۆتورلىق قۇقىقتىڭ حالىقارالىق قاعيداتتارى مەن نورمالارىنا سايكەس كەلەتىنىن بىلدىرەدى.
بۇعان دەيىن قازاقستاندا ورىنداۋشىلاردىڭ قۇقىقتارىن قورعاۋ ءۇشىن ءبىرىڭعاي سيفرلىق پلاتفورما قۇرۋ ۇسىنىلعان بولاتىن. ءاربىر جەرگىلىكتى مۋزىكانتتىڭ جەكە كابينەتى بولادى، وندا ولار ءوز اندەرىنىڭ قايدا جانە قانشا رەت ويناتىلعانىن ونلاين باقىلاي الادى دەپ ۋادە ەتىلگەن ەدى.