2026 جىلعى قاڭتار-مامىر ارالىعىندا قازاقستاندىقتار اقشا اۋدارىم جۇيەلەرى ارقىلى شەتەلگە 238 ملرد تەڭگە جىبەرگەن. بۇل وتكەن جىلدىڭ سايكەس كەزەڭىمەن سالىستىرعاندا 7،2%-عا از. شەتەلدەن تۇسكەن اۋدارىمدار كولەمى دە 9،9%-عا ازايىپ، 78،1 ملرد تەڭگەنى قۇراعان. بۇل تۋرالى infohub.kz حابارلايدى.
قاتارىنان ءۇشىنشى جىل بويى سىرتقا كەتەتىن اۋدارىمدار كىرىستەردەن ەداۋىر اسىپ تۇسۋدە: 2026 جىلدىڭ قاڭتار-مامىرىندا قازاقستاندىقتار شەتەلگە العاننان ءۇش ەسە دەرلىك كوپ قاراجات جىبەرگەن. سالىستىرۋ ءۇشىن، 2023 جىلدىڭ وسى كەزەڭىندە ايىرما 2،5 ەسە، ال 2022 جىلى 2،2 ەسە بولعان.
كورسەتكىشتەردىڭ تومەندەۋى 2022 جىلعى رەكوردتان كەيىن جالعاسۋدا. سول جىلى بەس ايدا شەتەلگە اۋدارىم كولەمى 391،4 ملرد تەڭگەگە، ال تۇسىمدەر 178،8 ملرد تەڭگەگە جەتكەن. 2026 جىلعا قاراي سىرتقى اعىم سول كەزەڭمەن سالىستىرعاندا 39،2%-عا، ال كىرىس اعىنى 2،3 ەسەگە قىسقارعان.
ون جىل بۇرىنعى (2016 جىلعى قاڭتار-مامىر) دەرەكتەرمەن سالىستىرساق، قازاقستاننان شەتەلگە اقشا اۋدارىم كولەمى 88،9%-عا وسكەن. ال شەتەلدەن كەلگەن قاراجات كولەمى كەرىسىنشە 8،8%-عا تومەندەگەن. بۇل سوڭعى جىلدارى قازاقستاندىقتاردىڭ شەتەلگە جىبەرەتىن اقشا اعىنى ايتارلىقتاي ارتقانىن، ال كىرىس اۋدارىمدارى ازايعانىن كورسەتەدى.