27 قىركۇيەككە قاراعان ءتۇنى قازاقستاننىڭ سەگىز وبلىسىندا جانە استانادا تۇنگى ۇسىك كۇتىلەدى. ال رەسپۋبليكانىڭ وڭتۇستىگى مەن وڭتۇستىك-شىعىسىندا نايزاعايلى جاڭبىر جاۋادى، كۇندىز كەي جەرلەردە شاڭدى داۋىل تۇرۋى مۇمكىن. بۇل تۋرالى قازگيدرومەت دەرەكتەرىنە سىلتەمە جاساپ، infohub.kz سايتى حابارلايدى.
سينوپتيكتەردىڭ بولجامىنشا، ەل اۋماعىنىڭ باسىم بولىگىندە اۋا رايى قۇرعاق بولادى. نايزاعايلى جاڭبىر تۇركىستان، جامبىل جانە قىزىلوردا وبلىستارىندا جاۋادى. شىمكەنتتە جاۋىن-شاشىن تاڭەرتەڭ جانە كۇندىز، تارازدا تۇندە كۇتىلەدى.
تۇركىستان وبلىسىنىڭ سولتۇستىگىندە، سونداي-اق قىزىلوردا وبلىسىنىڭ سولتۇستىگى مەن ورتالىعىندا كۇندىز شاڭدى داۋىل تۇرۋى مۇمكىن. ءبىرقاتار وڭىردە جەل ەكپىنى سەكۋندىنا 15–20 مەترگە جەتەدى.
تۇندە اقمولا، اقتوبە، قوستاناي، سولتۇستىك قازاقستان، پاۆلودار، شىعىس قازاقستان وبلىستارى مەن اباي وبلىسىنىڭ كەيبىر اۋداندارىندا اۋا تەمپەراتۋراسى ۇسىككە دەيىن تومەندەيدى. قاراعاندى وبلىسىنىڭ شىعىسىندا توپىراق بەتىندە ءبىر گرادۋسقا دەيىن ۇسىك كۇتىلەدى.
استانادا تۇندە توپىراق بەتىندە ەكى گرادۋسقا دەيىن ۇسىك بولجانادى. پاۆلوداردا — ءبىر گرادۋسقا دەيىن جانە تۇمان. تۇندە جانە تاڭەرتەڭ تۇمان ەلدىڭ باتىسى، سولتۇستىگى مەن ورتالىعىنداعى ءبىرقاتار اۋداندا، ونىڭ ىشىندە ورال مەن پەتروپاۆلدا دا كۇتىلەدى.
14 وبلىستا ءورت ءقاۋپى تولىق نەمەسە جەكەلەگەن اۋدانداردا ساقتالادى. ولاردىڭ قاتارىندا تۇركىستان، جامبىل، قىزىلوردا جانە الماتى وبلىستارى، سونداي-اق ۇلىتاۋ مەن جەتىسۋ وبلىستارى بار. قاراعاندى، جەزقازعان، اتىراۋ، شىمكەنت، تۇركىستان، قىزىلوردا جانە تارازدا بۇل ەسكەرتۋ قالالارعا دا قاتىستى.
بۇعان دەيىن قازگيدرومەت قازاقستانعا تۇنگى ۇسىك پەن العاشقى قار كەلە جاتقانىن ەسكەرتكەن بولاتىن.