قازاقستاندا بىرىككەن اراب امىرلىكتەرىنە ۇيىمداستىرىلعان تۋرلار ءۇشىن تۋركودتار قايتا بەرىلە باستادى. شەكتەۋ 28 اقپاندا، تاياۋ شىعىستاعى جاعداي ۋشىققان كەزدە ەنگىزىلگەن بولاتىن، دەپ حابارلايدى infohub.kz سايتى.
«تۋريستىك قامقور» كورپوراتيۆتىك قورىنىڭ NUR.KZ تىلشىسىنە مالىمدەۋىنشە، قازىرگى تاڭدا سىرتقى تۋريزم سالاسىندا ازاماتتاردىڭ قۇقىقتارىن كەپىلدەندىرۋ جۇيەسى تاراپىنان باا-گە ۇيىمداستىرىلعان تۋرلار ءۇشىن تۋركودتار بەرۋگە قويىلعان شەكتەۋ الىندى.
«جاعداي تۇراقتالىپ، تۋريستەر ءۇشىن تاۋەكەلدەر ازايعان سايىن ءباا باعىتى بويىنشا تۋركودتار بەرۋ قالپىنا كەلتىرىلدى جانە قالىپتى رەجيمدە جالعاسۋدا. كەپىلدەندىرۋ جۇيەسىنە قاتىساتىن تۋروپەراتورلار امىرلىكتەرگە ۇيىمداستىرىلعان تۋرلاردى ساتىپ العان تۋريستەرگە تۋركودتاردى راسىمدەي الادى. باا-مەن تۋريستىك قاتىناستىڭ قالپىنا كەلگەنىنىڭ تاعى ءبىر دالەلى — تۇراقتى اۋە قاتىناسىنىڭ قايتا جاندانۋى. ماسەلەن، Air Astana اۋەكومپانياسى 2026 جىلعى 2 قازاننان باستاپ دۋبايعا تۇراقتى رەيستەرىن قايتا باستايدى»، — دەپ حابارلادى قوردا.
قوردا 28 اقپاندا تاياۋ شىعىستاعى تۇراقسىز جاعدايعا بايلانىستى «تۋريستىك قامقور» وڭىردەگى ءبىرقاتار ەلگە تۋرلار بويىنشا تۋركودتار بەرۋدى ۋاقىتشا توقتاتقانىن ەسكە سالدى.
«ءبىز ءۇشىن تۋريستەردىڭ قاۋىپسىزدىگى مەن تۋريستىك نارىقتىڭ تولىققاندى جۇمىس ىستەۋ مۇمكىندىگى اراسىنداعى تەپە-تەڭدىكتى ساقتاۋ اسا ماڭىزدى. شەكتەۋلەر تاۋەكەلدەر جوعارى كەزەڭدەردە الدىن الۋ شاراسى رەتىندە ەنگىزىلەدى جانە جاعداي تالاپ ەتكەننەن ۇزاق ساقتالماۋى ءتيىس. ءبىزدىڭ مىندەتىمىز — وزگەرىستەرگە جەدەل دەن قويىپ، سونىمەن بىرگە تۋريستەرگە كەپىلدەندىرۋ جۇيەسىنىڭ قورعاۋ تەتىكتەرىن پايدالانۋ مۇمكىندىگىن قامتاماسىز ەتۋ»، — دەدى «تۋريستىك قامقور» كورپوراتيۆتىك قورىنىڭ ءتورايىمى يننا رەي.
قوردا «تۋريستىك قامقور» وڭىردەگى جاعدايدى باقىلاۋدى جالعاستىراتىنىن جانە تۋريستەرگە شەتەلگە ساپار جوسپارلاعاندا مەملەكەتتىك ورگاندار مەن اۋەكومپانيالاردىڭ وزەكتى ۇسىنىمدارىن ەسكەرۋ قاجەتتىگىن ەسكە سالاتىنىن قوستى.
ەسكە سالايىق، قىركۇيەكتىڭ ورتاسىندا Air Astana اۋەكومپانياسى قازاننان باستاپ الماتى مەن استانادان دۋبايعا تۇراقتى رەيستەرىن قايتا باستايتىنىن جاريالاعان بولاتىن. ۇشۋ جيىلىگى ءبىر اي ىشىندە بىرتىندەپ ارتتىرىلادى.