بيىلعى جىلدىڭ ءبىرىنشى جارتىجىلدىعىنىڭ قورىتىندىسى بويىنشا قازاقستاندا جۇرەك-قان تامىرلارى اۋرۋلارىنان، ونكولوگيادان جانە جول-كولىك وقيعالارىنان بولاتىن ءولىم-جىتىمنىڭ تومەندەگەنى تىركەلدى، سونداي-اق انا مەن بالا دەنساۋلىعىنىڭ كورسەتكىشتەرى جاقساردى، دەپ حابارلايدى infohub.kz سايتى.
دەنساۋلىق ساقتاۋ ءبىرىنشى ۆيسە-مينيسترى تيمۋر سۇلتانعازيەۆتىڭ ۆەدومستۆو القاسىندا مالىمدەگەنىندەي، جەتى اي ىشىندە انا ءولىمى 17،5%-عا، قان اينالىمى جۇيەسى اۋرۋلارىنان بولاتىن ءولىم 10،9%-عا، ونكولوگيالىق اۋرۋلاردان 5%-عا، ال جكو سالدارىنان 20،9%-عا ازايدى. جالپى حالىق ءولىمى 0،8%-عا تومەندەدى.
سۇلتانعازيەۆتىڭ ايتۋىنشا، وسى كەزەڭدە انا ءولىمى كورسەتكىشى 100 مىڭ ءتىرى تۋىلعان نارەستەگە شاققاندا 9،7-دەن 8،0-گە دەيىن تومەندەدى، نارەستە ءولىمى جوسپارداعى 7،3ء-تىڭ ورنىنا 5،93ء-تى قۇرادى، ال نەوناتالدىق ءولىم جوسپارداعى 4،1ء-دىڭ ورنىنا 3،05 بولدى.
ەكىنشى جارتىجىلدىقتا جۇكتىلىك اسقىنۋلارىنىڭ الدىن الۋعا، باقىلاۋ ساپاسىنا، پاتروناجعا جانە ۋاقتىلى مەديسينالىق كومەك كورسەتۋگە باستى نازار اۋدارۋ جوسپارلانۋدا. سونىمەن قاتار، ۆەدومستۆو اۋرۋلاردى ەرتە انىقتاۋ كورسەتكىشتەرى تومەن جانە پاسيەنتتەردى مارشرۋتتاۋدا پروبلەمالار بار وڭىرلەردە ونكوسكرينينگتەرمەن قامتۋدى كۇشەيتۋدى نيەتتەنۋدە.
«جىل قورىتىندىسى بويىنشا سەبەپتەردى ءتۇسىندىرۋ ەمەس، كورسەتكىشتەردىڭ ناقتى جاقسارۋى جانە حالىق ءۇشىن ناقتى ناتيجە قاجەت بولادى»، — دەپ اتاپ ءوتتى سۇلتانعازييەۆ.
بۇعان دەيىن 2026 جىلدىڭ العاشقى ءۇش ايىندا انا ءولىمى وتكەن جىلدىڭ سايكەس كەزەڭىمەن سالىستىرعاندا 43%-عا تومەندەگەنى، ال نارەستە ءولىمى 1000 جاڭا تۋعان نارەستەگە شاققاندا 5،92-دەن 5،56-عا دەيىن تومەندەگەنى حابارلانعان بولاتىن.