الماتىدا تايلاندتان سانيتارلىق اۆياسيامەن شۇعىل جەتكىزىلگەن شالا تۋعان ءسابيدى قۇتقارۋ تاريحى اياقتالدى. ەكى ايدان استام قارقىندى ەم، كۇردەلى وتا جانە تاۋلىك بويى باقىلاۋدان كەيىن نارەستە كۇشەيىپ، ودان ءارى وڭالتۋ ءۇشىن ۇيىنە شىعارىلدى، دەپ حابارلايدى infohub.kz.
پەدياتريا جانە بالالار حيرۋرگياسى عىلىمي ورتالىعىندا قازاقستان رەسپۋبليكاسى دەنساۋلىق ساقتاۋ مينيسترلىگىنىڭ دارىگەرلەرى تايلاندتىڭ پحۋكەت ارالىندا شالا تۋىپ، اۋىر حالدە جاتقان كىشكەنتاي اسلان اليەۆتىڭ ءومىرىن ساقتاپ قالدى. ەكى ايدان استام ەمدەلگەننەن كەيىن بالا امان-ەسەن ۇيىنە شىعارىلىپ، دارىگەرلەردىڭ باقىلاۋىمەن قالپىنا كەلۋىن جالعاستىرادى.
«مەديسينالىق ەۆاكۋاسيا كەزىندە بالانىڭ جاسى نەبارى 1 اي 18 كۇن بولدى. ونى سانيتارلىق اۆياسيا بورتىمەن الماتىعا وتە تومەن سالماقپەن جانە اۋىر اسقىنۋلارمەن جەتكىزدى. كەلگەننەن كەيىن نارەستەنى پەدياتريا جانە بالالار حيرۋرگياسى عىلىمي ورتالىعىنىڭ انەستەزيولوگيا، رەانيماسيا جانە قارقىندى تەراپيا بولىمشەسىنە جاتقىزدى»، — دەدى قازاقستان دەنساۋلىق ساقتاۋ مينيسترلىگىندە.
ەكى ايدان استام ۋاقىت بويى ورتالىق ماماندارى كىشكەنتاي پاسيەنتتىڭ ءومىرى ءۇشىن كۇرەستى. قارقىندى تەراپيا كەزىندە دارىگەرلەر ومىرگە ءقاۋىپ توندىرەتىن اسقىنۋ — ىشەكتىڭ جابىق پەرفوراسياسىن دەر كەزىندە انىقتادى. كونسيليۋمنان كەيىن شۇعىل حيرۋرگيالىق ارالاسۋ تۋرالى شەشىم قابىلداندى.
«بالالار حيرۋرگى پاتولوگيانى ءساتتى جويىپ، ومىرلىك ماڭىزدى وتا جاسادى. حيرۋرگيالىق ەمنەن كەيىن بالا نەوناتولوگتار، انەستەزيولوگ-رەانيماتولوگتار، بالالار حيرۋرگتارى، مەدبيكەلەر جانە باسقا دا مەديسينا قىزمەتكەرلەرى كىرگەن مۋلتيديسيپلينارلى توپتىڭ تاۋلىك بويى باقىلاۋىندا بولدى»، — دەپ اتاپ ءوتتى ۆەدومستۆودا.
كەشەندى تەراپيا، زاماناۋي مەديسينالىق تەحنولوگيالاردى قولدانۋ جانە مامانداردىڭ كاسىبي جۇمىسى ارقىلى نارەستەنىڭ جاعدايىن تۇراقتاندىرۋ مۇمكىن بولدى.
«ەمدەلۋ كەزىندە اسلان 1200 گرامم سالماق قوستى. ءقازىر ونىڭ سالماعى 2500 گرامم. بالا وتتەگىسىز وزدىگىنەن تىنىس الادى، تابيعي جولمەن تاماقتانادى، ال ىشەك قىزمەتى بىرتىندەپ قالپىنا كەلەدى. بۇل ونى ەمدەۋدىڭ كەلەسى كەزەڭىنە — ءۇي جاعدايىندا وڭالتۋعا اۋىستىرۋعا مۇمكىندىك بەردى»، — دەپ ءتۇسىندىردى قازاقستان دەنساۋلىق ساقتاۋ مينيسترلىگىندە.
پەدياتريا جانە بالالار حيرۋرگياسى عىلىمي ورتالىعىنىڭ باسشىسى اباي قۇسايىنوۆ ەمنىڭ ءساتتى بولۋى مامانداردىڭ ۇيلەسىمدى جۇمىسى مەن دەر كەزىندەگى مەديسينالىق ەۆاكۋاسيانىڭ ارقاسىندا مۇمكىن بولعانىن اتاپ ءوتتى.
«ەمدەۋدىڭ ءاربىر كەزەڭى سالماقتى كلينيكالىق شەشىمدەر مەن بۇكىل كوماندانىڭ بارىنشا شوعىرلانۋىن تالاپ ەتتى. دەر كەزىندەگى مەديسينالىق ەۆاكۋاسيا، جەدەل دياگنوستيكا، شۇعىل حيرۋرگيالىق ارالاسۋ جانە مامانداردىڭ كاسىبيلىگى ارقاسىندا ءبىز بالانىڭ ءومىرىن ساقتاپ قالدىق. اتاپ وتكىم كەلەدى، قىمبات تۇراتىن مەديسينالىق كومەكتىڭ بارلىق كەشەنىن ءسابيدىڭ وتباسى تەگىن، مەملەكەت ەسەبىنەن الدى»، — دەپ اتاپ كورسەتتى اباي قۇسايىنوۆ.
دەنساۋلىق ساقتاۋ مينيسترلىگىندە قازاقستاننىڭ ورتالىق ازياداعى سانيتارلىق اۆياسياسى ۇلتتىق جەدەل مەديسينالىق كومەك جۇيەسىنە كىرىكتىرىلگەن جالعىز ەل بولىپ قالا بەرەتىنىن اتاپ ءوتتى. ول پاسيەنتتەردى تاسىمالداۋدى عانا ەمەس، سونىمەن قاتار مامانداندىرىلعان دارىگەرلىك بريگادالاردىڭ شىعۋىن، جەرگىلىكتى جەردە كۇردەلى مەديسينالىق ارالاسۋلاردى جۇرگىزۋدى جانە پاسيەنتتەردى ايماقارالىق مارشرۋتتاۋدى قامتاماسىز ەتەدى.
ۆەدومستۆو نەوناتولوگ-دارىگەرلەرگە، انەستەزيولوگ-رەانيماتولوگتارعا، بالالار حيرۋرگتارىنا، مەدبيكەلەرگە، پەدياتريا جانە بالالار حيرۋرگياسى عىلىمي ورتالىعىنىڭ ۇجىمىنا، سونداي-اق سانيتارلىق اۆياسيا ماماندارىنا كىشكەنتاي پاسيەنتتىڭ ءومىرىن ساقتاپ قالۋعا مۇمكىندىك بەرگەنى ءۇشىن العىس ءبىلدىردى. اسلانعا مىقتى دەنساۋلىق، تولىق ساۋىعىپ كەتۋ جانە ءساتتى وڭالتۋ تىلەدى.